HISTORIA 95
Va̱ʼaní sa̱náʼa̱ ta̱ Jesús
IIN ki̱vi̱ ta̱ Jesús ni̱ka̱ʼa̱nra xíʼin iin ta̱a ña̱ xíniñúʼu kuʼvi̱-inira kunira ñanitáʼanra. Ta ta̱yóʼo ni̱nda̱ka̱tu̱ʼunra ta̱ Jesús: ʼ¿Ndáana kúú ñanitáʼi̱n?ʼ, káchira. Ta Jesús xa̱xíni̱vara ña̱ ndákanixi̱ní ta̱yóʼo. Ña̱ ndákanixi̱níra kúúña ña̱ iinlá na̱ yiví na̱ ñuura á na̱ xáʼa̱n veʼe-ñu̱ʼu nu̱ú xáʼa̱nra kúú na̱ ñanitáʼanra. Yóʼo kunda̱a̱-iniyó ndáaña ni̱ka̱ʼa̱n ta̱ Jesús xíʼinra.
Ña̱ va̱ʼa sánáʼa̱ ta̱ Jesús na̱ yiví sava yichi̱ xi̱natúʼunra historia xíʼinna ña̱ va̱ʼa kunda̱a̱-inina. Ta ña̱yóʼo kúú ña̱ na̱túʼunra vitin, na̱túʼunra xa̱ʼa iin ta̱a ta̱ ñuu Judá xíʼin iin ta̱ ñuu Samaria. Xa̱sa̱kuaʼayó xa̱ʼa na̱yóʼo, na̱ ñuu Judá kǒo kúni̱na xínina na̱ ñuu Samaria. Historia yóʼo kúú ña̱ na̱túʼunra xa̱ʼa:
Iin ki̱vi̱ iin ta̱ ñuu Judá ku̱a̱ʼa̱nra chí ñuu Jericó. Soo yichi̱ ki̱ta na̱ kui̱ʼná ta ki̱ndaana xu̱ʼúnra ta ka̱ninara, si̱loʼo kaʼnínara.
Tándi̱ʼi ku̱u ña̱yóʼo, saá ni̱ya̱ʼa iin ta̱ su̱tu̱ ta̱ ñuu Judá, tá xi̱nira ta̱ ta̱a ka̱ni na̱ kui̱ʼná yóʼo. ¿Á xíni̱ún ndáaña ke̱ʼéra? Ni̱ya̱ʼa xaara ta ku̱a̱ʼa̱nvara. Tasaá ni̱ya̱ʼa inka ta̱ káchíñu ini templo Ndióxi̱. ¿Á chi̱ndeé táʼanra xíʼin ta̱ ka̱nina yóʼo? Ni loʼo kǒo níchindeé táʼanra xíʼinra. Koto nu̱ú na̱ʼná, nda̱a̱ ni̱nu káa ku̱a̱ʼa̱n ta̱ su̱tu̱ xíʼin ta̱ káchíñu ini templo Ndióxi̱.
Koto, ¿ndáa ta̱ kúú ta̱ chíndeé táʼan xíʼin ta̱ ka̱ni na̱ kui̱ʼná yóʼo? Ta̱ ñuu Samaria kúúra. Ta vitin chíndeé táʼanra xíʼin ta̱ ñuu Judá ta̱ ka̱nina yóʼo, íxatátánrara. Tasaá nda̱kiʼinrara ku̱a̱ʼa̱n xíʼinra ta ndu̱kúra nu̱ú koora ña̱ va̱ʼa ndaʼa̱ra.
Tándi̱ʼi na̱túʼun ta̱ Jesús historia yóʼo, tasaá ni̱ka̱ʼa̱nra xíʼin ta̱ ni̱nda̱ka̱tu̱ʼun-ñaʼá: ʼKa̱ʼa̱n xíʼi̱n vitin, ¿ndáa na̱ kúú na̱ ndixa ni̱na̱ʼa̱ ña̱ kúʼvi̱-inina xínina ñanitáʼanna? ¿Á ta̱ su̱tu̱, á ta̱ káchíñu templo Ndióxi̱, á ta̱ ñuu Samaria?ʼ
Ta̱yóʼo nda̱kuiinra: ʼTa̱ ñuu Samaria kúú ta̱ ndixa kúʼvi̱-inina xíni ñanitáʼan. Chi chi̱ndeé táʼanra xíʼin ta̱ ka̱nina yóʼoʼ.
ʼVa̱ʼaní ni̱ka̱ʼún, ta vitin kuaʼán tasaá keʼún xíʼin inka na̱ yiví nda̱a̱ tá i̱xaa ta ñuu Samaria yóʼoʼ, káchi ta̱ Jesús xíʼinra.
¿Á kǒo kútóún ña̱ i̱xaa ta̱ Jesús ña̱ liviní sa̱náʼa̱rana? Íyo ku̱a̱ʼá ña̱ʼa kivi sákuaʼayó tá ná kaʼviyó Biblia, chi yóʼo va̱xi ña̱ ni̱ka̱ʼa̱n ta̱ Jesús.
