Keniuj tamachtij Jesús
Tanojnots 95
Keniuj tamachtij Jesús
SE TONAL Jesús kiiluij se takat ika monekia kintasojtas taltikpakneminij. Yej tajtanik: ‘¿Kemej akonimej moneki nikintasojtas?’ Jesús kimatia toni kinemilijtoya takat. Yej moluiaya ika monekia kintasojtas sayoj judíos uan tein pouiaj itech taneltokalis tein kipiaya. Yejika maj tikitakan toni kiiluij Jesús.
Iksa Jesús tamachtiaya ika tanojnotsmej. Uan axkan maj tikitakan se. Kitetapouij tein kipanok se judío uan se samaritano. Timomachtijkejya ika miakej judíos amo kiniyekitayaj samaritanos. Yejua nejin tanojnots:
Se tonal se judío temouaya itech ojti tein yaya Jericó. Sayoj ika seki takamej kitachtekijkej. Kikuilijkej itomin, kitelmaakej uan kiixtayoualtijkej.
Satepan, se tiopixkat judío panok itech ojti, uan kiitak takat takokol. ¿Toni timoluia kichiuak? Sayoj kitayoualuij uan yajki. Ompa, se levita tel taneltokakej panok ompakauin. ¿Motsakuilij? Amo, amo no motsakuilij kipaleuis takat. Ueli tikiniuejkaita tiopixkat uan levita pantemotiouij itech ojti.
Sayoj ika xikita akoni yetok nikan iuan takat judío tein takokol. Se samaritano uan kipaleuijtok. Yej kipajtilij kampa kikojkokojkej. Satepan, kiuikak kampa ueliskia moseuiskia uan pajtiskia.
Keman Jesús kitamiijtoj itanojnots, kitajtanij takat: ‘¿Akoni timoluia ika kinextilij netasojtalis takat tein kikojkokojkej? ¿Tiopixkat, levita, oso samaritano?’
Takat tanankilij: ‘Samaritano, tein kipaleuij takat takokol’.
Jesús kiiluij: ‘Melauj tein tikijtoua. Yejika, xiouj uan no ijkon xikinchiuiliti oksekin taltikpakneminij kemej yej kichiuak’.
¿Tikuelita kemej tamachtij Jesús? ¿Melauj ika tejuan uelis timomachtiskej miak taman tein motelneki ika tein kijtoj Jesús itech Biblia?
