Ken otlamachtiaya Jesús
TLAPOUALISTLI 95
Ken otlamachtiaya Jesús
SE TONAL, Jesús kiluia se tlakatl moneki kitlasojtlas ikni. Tlakatl kitlajtlania: ‘¿Akin nokni?’. Jesús kimati tlen mokuayejyekojtok nin tlakatl. Tlakatl mokuayejyekoa san tlaltikpaktlakamej tlen noijki oneskej itech ialtepetl uan tlen noijki kipiaj itlaneltokilis san yejuan ikniuan. Ik non, ma tikitakan tlen okilui Jesús.
Kemantika, Jesús otlamachtiaya ika se tlapoualistli. Uan axkan Jesús ijkon otlamachti. Okijto tlen opanok ika se judío uan se samaritano. Yotimomachtijkej ken miakej judíos amo okintlasojtlayaj samaritanos. Jesús okijto:
Se tonal, se judío otemoaya itech se ojtli itech tepetl pampa yaskia Jericó. Ijkuakon, sekimej tlakamej okitlachtekijkej. Okikixtilijkej nochi itomin, uan ken chikauak okiuijuitekej, non tlakatl yimikiskia.
Satepan, se teopixki judío opanok itech non ojtli. Okitak tlakatl akin okiuijuitekej. ¿Tlen okichi? San otlakotonki ipan ojtli uan amo omoketski. Satepan, opanok se levita tlen noijki okitekichiuiliaya toTajtsin Dios. ¿Omoketski? Amo, noijki amo omoketski pampa kipaleuiskia tlakatl. Xikita ken teopixki uan levita uejka yoyajkej.
Maski ijkon, xikita akin okipaleui tlakatl tlen okiuijuitekej. Se samaritano okipaleui nin tlakatl judío. Okitlalili pajtli kanin okikojkokojkej. Satepan, okiuikak nin tlakatl judío kanin uelis moseuiskia uan pajtiskia.
Ijkuak Jesús otlanki okijto nin tlapoualistli, okitlajtlani non tlakatl: ‘Ken tikita, ¿akin itech ninmej eyi tlakamej okiteititi okatka ikni akin okiuijuitekej? ¿Teopixki, levita, noso samaritano?’.
Tlakatl otlanankili: ‘Samaritano. Pampa ye okipaleui tlakatl tlen okiuijuitekej’.
Jesús okijto: ‘Melauak tlen otikijto. Ik non, axkan xio uan xikintlasojtla oksekimej ijkon ken okichi non tlakatl’.
¿Amo mitspaktia ken otlamachtiaya Jesús? Tejuan uelis timomachtiskej miak tlamantli tlen miak ipati itech tlen Jesús okijto tlen ijkuilitok itech Biblia, ¿amo melauak?
