ESIKU limwe Jesus ota lombwele omulumentu kutya ye oku na okuhola omukwawo. Omulumentu ota pula Jesus: ‘Omukwetu olye?’ Ano Jesus oku shi shoka omulumentu nguka ta dhiladhila. Omulumentu ota dhiladhila kutya omukwawo aantu owala mboka yomuhoko gwe noyelongelokalunga lye. Ano natu tale shoka Jesus ta ti kuye.

Oolumwe Jesus ota longo yalwe moku ya hokololela ehokololo. Osho shoka ye ta ningi ngashingeyi. Ye ota hokolola ehokololo kombinga yOmujuda nOmusamaria. Tse otwi ilonga nale kutya Aajuda oyendji kaye hole Aasamaria. Ehokololo lyaJesus olyo ndika:

Esiku limwe Omujuda okwe ende nondjila yokondundu ta yi kuJeriko. Ihe aayugi oye mu ponokele. Yo oye mu kutha iimaliwa ye noye mu dhenge sigo konyala a se.

Konima omusaaseri Omujuda okwe ende po. Ye okwa mono omulumentu ngoka omweehamekwa. Mbela ngoye oto dhiladhila kutya ye okwa ningi po shike? Ye okwa yi owala nombinga yilwe yondjila nota tsikile nolweendo lwe. Opo tuu mpoka omuntu gulwe i ishi uukalunga okwa piti po. Ye okwa li Omulevi. Ye mbela okwe mu kwatha ngaa? Aawe, ye naye wo ina kwatha omulumentu omweehamekwa. Ngoye oto vulu okumona omusaaseri nOmulevi mpeyaka kokule taye ende nondjila.

Ihe olye nguka pomulumentu omweehamekwa? Oye Omusamaria. Nota kwatha Omujuda. Ye ota tula omiti piilalo ye. Konima ye ota fala Omujuda kehala hoka ye ta vulu okuvululukwa nokwaaluka.

Kehulilo lyehokololo lye Jesus ota pula omulumentu ngoka a pulile epulo: ‘Olye gwomwaambaka yatatu ngoye to dhiladhila a katuka ngaashi oye omukwawo gwomweehamekwa? Omusaaseri, Omulevi nenge Omusamaria?’

Omulumentu ota yamukula: ‘Omulumentu Omusamaria. Ye okwa li nawa nomulumentu ngoka e ehamekwa.’

Jesus ota ti: ‘Ngoye ou li mondjila. Ano inda u ka ningile yalwe ngaashi naanaa omulumentu ngoka a ningi.’

Ngoye ku hole mbela omukalo ngoka Jesus a longo nagwo yalwe? Tse otatu vulu okwiilonga iinima oyindji ya simana ngele tse otatu pulakene shoka Jesus ta ti mOmbimbeli, hasho mbela?