ONTHIKI imue Yesu watolela omulume umue okuti una yokukala nohole novo munthele yae. Omulume oo apulu Yesu okuti: ‘Olie omunthele yange?’ Yesu ankho utyii oityi omulume oo, ekahi nokusoka. Omulume oo, ankho usoka okuti ovanthu votyivala tyae no vongeleya yae, ovo vala o omunthele yae. Mahi tutalei etyi Yesu emupopila.

Pamue Yesu ankho ulongesa mokupopia ehipululo. Pahe ngatyo alinga. Yesu wapopia ehipululo limue kombinga yomu Judeu nomu Samaritanu. Tuelilongesale okuti otyinyingi tyova Judeu ankho veyele ova Samaritanu. Pahe eli olio ehipululo lia Yesu:

Onthiki imue, omulume umue omu Judeu ankho ukahi nokulauka mondyila yokuenda ko Jerikoo. Mahi ahonyo no makongombanda. Vemupola onombongo mbae avemuvete unene avemusi ombete.

Konyima, o saserdote imue omu Judeu waenda metapalo olio. Wamona omulume oo wavetua. Utyii oityi alinga? Wayapukila konthele onkhuavo yetapalo aende. Apalambela vali omunthu omukuavo ankho uhole unene ongeleya. Ankho omu Levita. Okuti watalamene opo akuateseko omulume oo, wavetua unene? Au, katalamene. Tala polutalatu apa, o saserdote nomu Levita vekahi metapalo nokuenda.

Mahi, pahe tala ou ukahi apa nomulume ou wavetua. Omulume ou omu Samaritanu. Ukahi nokukuatesako omu Judeu. Ukahi nokupaka ovi-​hemba povipute viae. Ko-nyima, emutuala pompha-​ngu imue apa apondola okupululukwa no kukala nawa.

Etyi amana ehipululo liae, Yesu wapopila omulume una ankho walinga epulo okuti: ‘Povalume ava vetatu, olie walekesa okuti omunthele yomulume oo, wokuavetua? O saserdote, nomu Levita? Ine o Samaritanu?’

Omulume akumbulula okuti: ‘Omu Samaritanu. Oe walekesa ohole omulume wokuavetua.’

Yesu ati: ‘Wapopia nawa. Enda, etyi otyo ukalinga vakuenyi.’

Kuhambukwa onkhalelo omu Yesu alongesila? Tupondola okulilongesa ovipuka ovinyingi inkha tutehelela etyi Yesu apopia Mombimbiliya. Hatyoko?