Omuringo ogu Yesu Arikwegyesamu
Ekitebyo 95
Omuringo ogu Yesu Arikwegyesamu
EIZOOBA rimwe, Yesu agambira omushaija ngu ashemereire kukunda mutaahi we. Omushaija abuuza Yesu ati: ‘Mutaahi wangye niwe oha? Manya, Yesu naamanya eki omushaija ogu arikutekyereza. Omushaija naateekateeka ngu abantu b’eihanga rye bonka nari shi ab’ediini ye bonka nibo bataahi be. Mbwenu reka tureebe eki Yesu araamugambire.
Obumwe n’obumwe Yesu naayegyesa arikutebya ekitebyo. Eki hati nikyo arikukora. Naatebya aha Muyudaaya n’Omusamaria. Tuherize kwega ngu Abayudaaya baingi tibarikukunda Basamaria. Eki nikyo kitebyo kya Yesu.
Eizooba rimwe, hakaba hariho Omuyudaaya owaabaire ari omu rugyendo naashuuma Yeriko. Abambuzi baamugurukira. Baatwara empiiha ze kandi baamuteera baasiga ari haihi kufa.
Bwanyima, omunyamurwa Omuyudaaya aija naahingura. Areeba omushaija owaaterwa. Nooteekateeka ngu mbwenu akakora ki? Akamwetantara yaamwehuzya yaaraba hangahari yaagumizamu yaayegyendera. Bwanyima ondiijo munyadiini munonga nawe yaija. Ogu akaba ari Omuleevi. Mbwenu we akeemereraho? Ngaaha, nawe tarayemereire kuhwera owaabaire ateirwe. Noobaasa kureeba omunyamurwa n’Omuleevi hangahari nibeegyendera omu muhanda.
Kwonka reeba ogwo ori n’omushaija oteirwe. N’Omusamaria. Ariyo naahwera Omuyudaaya. Ariyo naata omubazi aha buhuta bwe. Bwanyima, akatwara Omuyudaaya omu nju y’okuhuumuriramu ngu abe gye.
Ku yaaherize ekitebyo kye, Yesu yaagambira omushaija owaamubuurize ekibuuzo ati: ‘Ahari abo bashatu, nooteekateeka ngu n’oha owaakozire nka mutaahi w’ogwo owaabaire ateirwe? Noogira ngu akaba ari Omunyamurwa, Omuleevi, nari Omusamaria?’
Omushaija amugarukamu ati: ‘N’Omusamaria. Akagirira ogwo owaateirwe embabazi.’
Yesu agira ati: ‘Ohikire. Mbwenu gyenda naiwe otwaze bataahi baawe otyo nka we oku yaakozire.’
Torikukunda omuringo ogu Yesu arikwegyesamu? Nitubaasa kwega ebintu bingi munonga eby’omugasho twahurikiza ebi Yesu arikugamba omu Baibuli, tikwo?
