EEMOL säd Jesus to eenen Maun, hee sull sienen Näakjsten goot sennen. De Maun fruach Jesus: ‘Wäa es mien Näakjsta?’ Jesus wist, waut de Maun bie sikj docht. Dee docht, siene Näakjste wieren bloos dee von sien ieejnet Volkj un waut dänselwjen Gloowen hauden. Well wie mol seenen, waut Jesus to dän säd.

Eenjemol vetald Jesus eene Jeschicht toom aundre waut lieren. Un daut deed hee uk ditmol. Hee vetald eene Jeschicht von eenen Jud un eenen Samarita. Soo aus wie aul weeten, jleichten de mieeschte Juden de Samarita nich. Na jo, de Jeschicht wia soo:

Doa wia mol een Jud, dee jinkj opp eenen Wajch derch de Boaj no de Staut Jericho. Oba hinjawäajes wort dee von Reiba äwafollen. Dee neemen dän aulet Jelt fuat un kjielden dän haulf doot.

Lota kjeem doa een judischa Priesta vebie un sach dän Maun doa haulf doot ligjen. Waut jleefst du, waut de Priesta deed? Dee jinkj bloos aune aundre Kaunt Wajch vebie. Dan kjeem doa een aundra Maun aun, waut uk sea fromm wia. Daut wia een Levit. Weet aus dee wudd stonen bliewen un dän oamen Maun halpen? Nä, dee deed nich. Opp daut Bilt kaust du seenen, woo de Priesta un de Levit dort aufgonen.

Oba kjikj mol, wäa dän Maun doa halpen deit. Daut es een Samarita. Dee berold dän Jud siene Wunden un brocht dän no eene Städ, wua dee sikj kunn vereiwen un wada koasch woaren.

Nu fruach Jesus dän Maun, dän hee dise Jeschicht vetalt haud: ‘Waut denkjst du, wäa von de dree wia een gooda Näakjsta? Wia daut de Priesta, de Levit ooda de Samarita?’

De Maun auntwuad: ‘Daut wia de Samarita, wiels dee kjemmad sikj om dän vewunden Maun.’

Jesus säd: ‘Du hast rajcht jesajcht. Sie to aundre krakjt soo, aus de Samarita wia.’

Wia Jesus nich een gooda Liera? Kjenn wie nich väl von Jesus lieren, wan wie enne Bibel läsen?