PA JUN qʼij ri Jesús xubʼij che jun achi che rajawaxik kuloqʼoqʼej ri täq winaq. Wajun achi xuta wariʼ che: ‹¿Jachin laʼ ri winaq rajawaxik kinloqʼoqʼej?› Ri Jesús retaʼm su kʼo pa ujolom ri achi. Ri achi kuchomaj che xaq xiw ri winaq rech ri utinamit xuqujeʼ ri junam kikojonem rajawaxik keraj. Rumal laʼ chqilaʼ su xubʼij Jesús che.

Kʼo jujun täq mul che ri Jesús xukʼut rukʼ täq xebʼantajik. Are waʼ xubʼan kimik. Xutzijoj jun bʼantajik rech jun judío xuqujeʼ jun samaritano. Xqetaʼmaj che kʼi chike ri täq judíos utz ta kkil ri täq samaritanos. Ri xbʼantajik are wariʼ:

Pa jun qʼij jun judío tijan kqaj bʼi pa jun bʼe rech jun juyubʼ rech kbʼe pa Jericó. Tekʼuriʼ nikʼaj achijabʼ xkelqʼaj bʼi upwäq xuqujeʼ xkechʼay kanoq, jubʼiqʼ xraj xkekamsaj.

Tekʼuriʼ, xqʼax jun ajkojol tabʼal toqʼobʼ aj judío pa ri bʼe. Xril ri achi chʼayom. ¿Su kabʼij at che xubʼano? Xaq xiw xuxalqʼatej ubʼe xuqujeʼ xbʼek. Tekʼuriʼ xqʼax chi jun chik achi nim ukojonem. Are jun levita. ¿La xtakʼeʼik? Xtakʼeʼ ta che utoʼik ri achi. Chawilampeʼ ri ajkojol tabʼal toqʼobʼ xuqujeʼ ri levita naj e kʼo wi che ri bʼe ikim.

Tekʼuriʼ chawilampeʼ jachin laʼ kʼo rukʼ ri achi chʼayom. Are jun samaritano. Tijan kutoʼ jun judío. Wajun achi xukoj kunabʼal che ri soktajnäq wi. Tekʼuriʼ, xukʼam bʼi ri judío pa jun lugar rech kuxlanik xuqujeʼ kkuntajik.

Chiʼ xukʼis ubʼixik wajun bʼantajik, Jesús xuta che ri achi: ‹¿Jachin laʼ chike ri oxibʼ achijabʼ kabʼij at che xubʼan jun utzil che wajun winaq riʼ? ¿La are ri ajkojol tabʼal toqʼobʼ, are ri levita, o are ri samaritano?›

Ri achi xubʼij wariʼ: ‹Are ri samaritano. Areʼ xubʼan utzil che ri achi soktajnäq›.

Jesús xubʼij wariʼ: ‹Qastzij kabʼij. Rumal laʼ, jat chabʼanaʼ awe junam rukʼ xubʼan ri samaritano›.

¿La utz kawil at ri täq ukʼutunik ri Jesús xuyaʼo? Öj xuqujeʼ kojkunik kqetaʼmaj kʼi jastaq nim ubʼantajik che xukʼut Jesús kʼo pa ri Loqʼalaj Pixabʼ. ¿La qastzij?