HUK punchawmi Jesusqa huk runata nirqa runamasinta kuyananpaq. Chaymi chay runaqa tapurqa: ‘¿Pitaq runamasiyqa?’ nispa. Jesusqa yachachkanmi chay runapa piensasqanta. Chay runaqa piensanyá, castamasillan hinaspa iñiqmasillan otaq vecinollan runamasinqa kasqanta. Ichaqa qawasun Jesuspa nisqanta.

Wakin kutikunapiqa Jesusqa willakuykunawanmi yachachirqa. Chaynatamá kunanpas yachachirqa. Chaymi judio runamantawan Samaria runamanta willarqa. Yacharamunchikñam judio runakunaqa Samaria law runakunata cheqnisqankuta. Chaymantam kay willakuyqa:

Huk punchawmi Judea law llaqtayoq runaqa qenqo ñanninta uraykamuspan Jerico llaqtaman richkarqa. Hinaptinmi suwakuna saltearurqa. Qollqentapas qechuruspankum maqaparuspa saqerurqaku wañunayachkaqtaña.

Chaymantam huk sacerdote chay qenqo ñanninta hamuchkarqa. Hinaspa maqapasqa runata rikururqa. ¿Imatataq payqa rurarqa? Karullantam pasarurqa. Chaymantapas huk religioso runapas hamuchkarqa. Payqa Leviy casta runam karqa, ¿yaqachu yanaparqa? Paypas manam yanaparqachu chay salteasqa runataqa. Dibujopi qaway chay sacerdotepas chaynataq leviy runapas uraytaña richkanku.

Ichaqa pitaq chay llakipi kaq runawanqa kachkan. Payqa Samaria lawmanta runam. Salteasqa judio runatam payqa yanapachkan. Paymá hampiwan heridankunatapas hampichkan. Hinaspam chay runataqa samana wasiman aparqa sanoyananpaq.

Chayta willaruspanmi Jesusqa tapuqninta nirqa: ‘Chaynaqa, ¿chay kimsan runamantaqa, mayqannintaq salteasqapa runamasin hina yanaparqa? ¿Sacerdotechu, Leviy ayllu runachu icha Samaria law runachu?’ nispa.

Hinaptinmi chay tapuqnin runaqa nirqa: ‘Samaria lawmanta runam. Paymi llakipayaspan yanaparqa salteasqa runata’ nispa.

Chaymi Jesusñataq nirqa: ‘Allintam nirunki. Chaynaqa, chaynatayá qampas runamasikita ruray’ nispa.

¿Manachu Jesuspa kayna yachachisqanqa gustasunki? Jesuspa imayna yachachisqanmantaqa achka allin yachachikuykunatam ñoqanchikqa Bibliapa nisqanwan yachachwan, ¿aw?