MBÓO mbiʼi Jesús niʼthúu̱n mbáa xa̱biya̱ dí ikhaa gíʼmaa maʼndoo kaʼyoo xa̱bu̱ numbaaʼ ga̱jma̱a̱. Xa̱biya̱ naraxi: ‹Tsáa nindxu̱u̱ xa̱bu̱ numbaaʼ gajmuʼ rá.› Mú Jesús ndaʼyoo má rí xtáa randxaʼwáminaʼ xa̱bu̱ buʼko̱. Xa̱biya̱ xtáa randxaʼwáminaʼ rí mbóó xa̱bu̱ bi̱ nindxu̱u̱ raza ndrígóo ga̱jma̱a̱ bi̱ nagún náa religión ndrígóo o xa̱bu̱ bi̱ kuwa náa mijngii xtáa, nindxu̱ún xa̱bu̱ numbaaʼ ga̱jma̱a̱. Ikha jngó, guʼyáá rí niʼthúu̱n Jesús.

Nguáná Jesús naʼsngáa índo̱ naʼthí ga̱jma̱a̱ numuu mbá historia. Rígi̱ nindxu̱u̱ rí naʼni xúgi̱. Naʼthí rí nirígá nákha wajyúúʼ ga̱jma̱a̱ numuu mbáa xa̱bu̱ judío ga̱jma̱a̱ numuu mbáa xa̱bu̱ samaritano. Nijmañulúʼ rí mbaʼin judíos tsiñun gúñún xa̱bu̱ samaritanos. Rígi̱ ñajunʼ mbá dí nirígá:

Mbóo mbiʼi mbáa judío na̱jkha̱ ragajta̱a̱ náa mbá kamba̱a̱ dí rígá náa kúbá rí na̱jkha̱ náa Jericó. Mú tikhun kuʼwáʼ nirikháá mu muriyakaʼyíiʼ mbújkho̱o̱ ga̱jma̱a̱ nixnáá asndu itháan muxiyáa.

Nda̱wa̱á, mbáa ndxajkun judío ninújngoo náa kamba̱a̱. Ndiʼyoo xa̱biya̱ bi̱ nixnáá. Lá natayáá ndiéjunʼ niʼni xáʼ. I̱ndó ninújngoo imbo̱o̱ nijniúu kamba̱a̱ ga̱jma̱a̱ ni̱jkha̱ má xúʼko̱. Nda̱wa̱á ninújngoo imba̱a̱ xa̱bu̱ bi̱ nambáyuu ndxajkun bi̱ ñajunʼ levita. Lá niwi̱ji̱ xáʼ. Na̱nguá, asndu má ma̱ngaa na̱nguá niwi̱ji̱ mu mambáyuu xa̱biya̱. Nandoo natayáá ndxajkun ga̱jma̱a̱ xa̱bu̱ levita bi̱ nakujmiin rí nagún raguájtaa náa kamba̱a̱.

Mú atayáá tsáa xtáa gi̱jyooʼ ga̱jma̱a̱ xa̱bu̱ bi̱ nixnáá. Ikhaa ñajunʼ mbáa xa̱bu̱ samaritano. Ga̱jma̱a̱ xtáa rambáyuu xa̱bu̱ judío. Ikhaa xtáa raʼnitanuu náa nigawúunʼ. Nda̱wa̱á na̱jkha̱ kayáa xa̱bu̱ judío náa ma̱ndoo mbayáa xu̱ʼ ga̱jma̱a̱ náa maʼni̱i̱la.

Nda̱wa̱á rí guámbóo niʼthí rí nirígá, Jesús naʼthúu̱n xa̱bu̱ bi̱ niʼniu graxe̱: ‹Tsíin bi̱ ajtsúun bugi̱ niʼni xóo xa̱bu̱ numbaaʼ náa xa̱bu̱ bi̱ nixnáá rá. Lá ndxajkun, levita, o samaritano rá’.›

Xa̱biya̱ nariʼña: ‹Ikhaa ñajunʼ samaritano. Bi̱ niʼni rí májánʼ náa xa̱biya̱ bi̱ nixnáá›.

Jesús naʼthí: ‹Májánʼ ñajunʼ dí rathá. Ikha jngó, ayuʼ ga̱jma̱a̱ ataniu̱u̱n eʼwíínʼ xa̱bu̱ xóo má niʼni’ ikhaa›.

Lá na̱nguá niguaʼ xú káʼnii eʼsngáa Jesús ráʼ. Lá ragájkhun rí ikháanʼ ma̱ndoo majmañulúʼ mbaʼa rí gíʼdoo wéñuʼ numuu rí naʼthí Jesús náa Biblia ráʼ.