ETEKE limue Yesu wa sapuila ulume umue okuti, eye wa sukilile oku sola vakuavo. Ulume waco wa pulisa Yesu hati: Vakuetu vaco velie? Yesu wa kũlĩhĩle eci ulume a kala loku sima. Ulume wa kala oku sima okuti vakuavo, omanu vana vakuekova liaye ale vakuetavo liaye. Tu konomuisi eci Yesu o sapuila.

Olonjanja vimue, Yesu wa longaisa loku ta alusapo. Eci oco a kasi loku linga cilo. Eye wo sapuila olusapo lualume vavali, umue u Yudea ukuavo u Samaria. Tua lilongisile ale okuti va Yudea ka va solaile va Samaria. Olusapo luaco luolu:

Eteke limue ulume umue wa kala oku lokila ko Yeriko. Eye wa kuatiwa lovingumba. Vonyana olombongo viaye, kuenje vio sia lokamuenyo kimbanda.

Noke, ocitunda cimue ca kala oku pita vonjila yaco. Eye wa pita ombamba. Nye ove o sima okuti oco eye a linga? Eye wa vanja konele yikuavo kuenje wa enda lonjila yaye. Noke kua pita ulume ukuavo, u Lewi. Anga hẽ eye wa talama? Sio, ka talamele kuenda ka kuatisile ulume wa vetiwa. Tu lete palo ocitunda kuenda u Lewi va molehẽla ocipãla, ovo va yapukila kumue kuiñi.

Kaliye tala helie okasi lulume wa vetiwa. Ulume waco u Samaria. Eye okasi loku kuatisa ulume u Yudea. Eye okasi loku u kapa ovihemba kapute vaye. Noke wo tuala konjo yolongende oco a tatiwe.

Eci a mala olusapo, Yesu wa pulisa ulume waco hati: ‘Helie pokati kalume vatatu osima okuti eye wa linga eci ciwa kulume wa vetiwa? Una ocitunda ale u Lewi ale u Samaria?

Ulume wa kumbulula hati: ‘Ulume u Samaria. Eye wa linga eci ciwa kulume wa vetiwa.’

Yesu wa popia laye hati: ‘Oco muẽle. Kuende ka lingaingevo ndoco.’

Anga hẽ ku sanjukila ndomo Yesu a longasaile? Tu ka lilongisa vali ovina vialua, nda tua pokola kueci Yesu a popia Vembimbiliya.

Luka 10:25-37.