Ḽiṅwe ḓuvha Yesu a vhudza munna uri u fanela u funa wa hawe. Munna a vhudzisa Yesu: ‘Wa hashu ndi nnyi?’ Ee, Yesu o zwi ḓivha zwe munna a vha a tshi khou humbula. O humbula uri vhathu vha lushaka lwa hawe fhedzi na vha vhutendi hawe vho vha vhe vhone vha hawe. Kha ri vhone uri Yesu o ri mini khae.

Zwiṅwe zwifhinga Yesu o vha a tshi funza nga u amba mafhungo. A ita ngauralo zwenezwo. A amba mafhungo nga ha Muyuda na Musamaria. Ro no ḓi guda uri Vhayuda vhanzhi vho vha vha sa funi Vhasamaria. Zwino, mafhungo a Yesu ngea:

Ḽiṅwe ḓuvha ho vha hu na Muyuda a tshi khou tsa nga nḓila a tshi khou ya Yeriko. Fhedzi mavemu a mu fhufhela. A dzhia tshelede yawe a mu rwa u swikela a tshi nga o fa.

Nga murahu, ha ḓa tshifhe wa Muyuda nga nḓila. A vhona munna o rwiwaho. Ni humbula uri o ita mini? Ngani, o sokou pfukela kha iṅwe thungo ya nḓila a ṱuwa. Ha ḓa muthu wa vhutendi vhukuma. O vha e Mulevi. Naa o ima? Hai, na ene ho ngo ima uri a thuse munna o rwiwaho. Ni nga vhona tshifhe na Mulevi vhe kule vha tshi khou tsa nga nḓila.

Fhedzi vhonani a re na munna o rwiwaho afha. Ndi Musamaria. U khou thusa Muyuda. U khou mu shela mushonga kha zwilonda zwawe. Nga murahu, a isa Muyuda he a vha a tshi nga awela hone a fhola.

O no fhedza mafhungo awe, Yesu a ri kha munna o mu vhudzisaho mbudziso: ‘Ndi ufhio wa avha vhararu ane wa humbula uri o shuma sa wa hawe wa munna o rwiwaho? Ndi tshifhe? Mulevi kana Musamaria?’

Munna a fhindula: ‘Ndi munna wa Musamaria. O vha na vhulenda kha munna o rwiwaho.’

Yesu a ri: ‘Wo amba zwone. Ngauralo tshimbila u fare vhaṅwe nga nḓila ye a ita ngayo.’

Naa nḓila ye Yesu a vha a tshi funza ngayo a ni i funi? Ri nga guda zwithu zwinzhi zwihulwane arali ra thetshelesa zwine Yesu a amba Bivhilini, naa ri nga si gude?

Luka 10:25-37.