LISIKU line Yesu akumsalila mundu kuti akusosekwa amnonyeleje mnasi jwakwe. Mundujo akum’wusya Yesu kuti: ‘Mnasi jwangu nduni?’ Yesu akumanyilila yakuganisya munduju panganiji. Mundujo akuganisya kuti ŵandu ŵa mtundu wakwe, soni ŵa dini jakwe ni ŵali acanasi ŵakwe basi. Sambano kwende tulole yakumsalila Yesu.

Ndaŵi sine Yesu akusajiganya mwakutagulila ngani. Yeleyi ni yakutenda sambano jino. Akutagulila ngani jakwamba ya Myuda ni Msamaliya. Tulijiganyisye kala kuti Ayuda ŵajinji ngakusiŵanonyela Asamaliya. Ngani jakutagulila Yesu jili aji:

Lisiku line Myuda jwine ŵajendaga pa litala lya m’matumbi lyakwawula ku Yeliko. Nambo ŵasimene ni akacikwanje. Ŵamsumwile mbiya syakwe, soni ŵamputile acimlekaga ali asigele panandi kuwa.

Kaneko, jwambopesi jwa Ciyuda ŵajendaga pa litala lilyolyo. Jwalakwe ŵam’weni mundu jwam’wulale jula. Ana akuganisya kuti ŵatesile cici? Ŵagambile kum’ŵambala nikwendelecelaga ulendo wakwe. Kaneko kwayicesoni mundu jwine jwakukulupilila ya dini mnope. Jwalakwe ŵaliji Mlefi. Ana ŵajimi? Jwalakwejusoni nganajima kuti amkamucisye mundu jwam’wulale jula. Komboleka kuti akum’wona jwambopesi ni Mlefi ŵakwendelecela ulendo wawo petalapo.

Nambo sambano alole jwali ni mundu jwamputile ŵandu jula. Ali Msamaliya. Soni jwalakwe akumkamucisya Myuda. Akutaga mtela m’maŵanga mwakwe. Kaneko akumjigalila Myudajo kumalo kwampaka akapumule nikuŵa cenene.

Yesu pamalisisye ngani jakwe, akuŵeceta kwa mundu juŵam’wusisye ciwusyo jula kuti: ‘Mwa ŵandu ŵatatuŵa, ana mkuganisya kuti nduni juŵatesile yindu mpela mnasi jwa mundu juŵamputile ŵandu jula? Ana ŵaliji jwambopesi, Mlefi jula kapena Msamaliya?’

Mundu jula akwanga kuti: ‘Msamaliya jula. Jwalakwe ŵatesile yindu yambone kwa mundu juŵamputile ŵandu jula.’

Yesu akumsalila kuti: ‘Mjanjile cenene. Jawulagani sambano, nomwe ŵakwe mkatendeje m’yoyo.’

Ana wawojo ngakukanonyela kajiganye ka Yesu? M’weji komboleka kulijiganya yindu yakusosekwa yejinji naga tukupikanila yakuŵeceta Yesu m’Baibulo, ngati m’yoyo?