Ododo 96

Yecu Ocango Lutwo

KA Yecu woto i dye lobo meno ducu, en cango lutwo. Lok i kom tango magi kitito pire oromo kin paco ki boma matino tino murumo piny ducu. Ci dano gukelo bote luput ki lutowang ki luding it, wa ki jo mukene mapol ata ma komgi lit. Ci Yecu ocango gin ducu.

Mwaka makato adek dong okato cakke i kare ma Jon obatija iye Yecu. Yecu owaco bot lukwenane ni cokcoki en ebicito Jerucalem, ka ma kibineke iye, ka i ngeye ebicer ki i to. Ento i kin kare-ni, Yecu tye ka medde ki cango lutwo.

I nino mo acel Yecu onongo tye ka pwony i ceng Cabit. Cabit aye nino me yweyo pa Lujudaya. Dako ma ineno kannyi kome onongo lit tutwal. En onongo kore ogom woko, ma pe romo cung malo atir pi mwaka 18 kulu. Pi meno Yecu oketo cinge i kome, ci en ocako tirre malo. En ocang woko!

Man omiyo akemo omako ludito dini tutwal. Ngat acel i kin-gi odangnge bot lwak ni: ‘Tye nino abicel ma myero wati iye tic. Meno aye nino ma myero wubin iye wek gicangwu, pe i ceng Cabit!’

Ento Yecu ogamo ni: ‘Wun jo maraco. Ngat mo i kinwu gire romo gonyo kanawu ci tero woko ka mato pii i ceng Cabit. Pe myero dako man magoro, ma dong ocanne ki two pi mwaka 18 kulu-ni, ocang i ceng Cabit?’ Lagam pa Yecu omiyo lewic omako jo maraco magi.

Lacen Yecu gin ki lukwenane guwoto gucito tung Jerucalem. Ma onongo pud gukato nge boma me Jeriko akata, lutowang aryo mo guwinyo ni Yecu tye ka kato kenyo. Pi meno gin gudangnge ni: ‘Yecu, konywa ba!’

Yecu olwongo lutowang meno bote, ci openyo ni: ‘Wumito ni atim ngo piwu? Guwaco ni: ‘Rwot, mi wangwa oyabbe.’ Yecu ogudo wanggi, ci cutcut dong gitwero neno piny! In ingeyo pingo Yecu timo tango me aura magi ducu? Pien en maro dano dok mito ni gin gubed ki niye i kome. Pi meno watwero bedo ki gen ni ka en biloc macalo Kabaka pe tye ngat mo i lobo ma kome bibedo lit.

Matayo 15:30, 31; Luka 13:10-17; Matayo 20:29-34.