KƐ ZEZI wlánwlán klɔ’m be su’n, nn ɔ́ yó tukpacifuɛ’m be juejue. I abonuan ninnge nga ɔ yo be’n, be truli klɔ kanngan mun nin klɔ dandan’m be su. Ɔ maan sran’m be fa cɛcɛwafuɛ mun, ɔ nin aɲinsifuɛ mun, ɔ nin bobofuɛ mun, ɔ nin tukpacifuɛ kpanngban wie mun ekun be blɛli i. Zezi yoli be kwlaa be juejue.

Zan yoli Zezi i batɛmu’n i afuɛ nsan w’a sin. Zezi se i sɔnnzɔnfuɛ’m be kɛ ɔ su wa kɔ Zerizalɛmu, naan lɔ yɛ bé wá kún i ɔ, kpɛkun Ɲanmiɛn ɔ́ wá cɛ́n i nguan. Kɛ ɔ́ kɛ́n i sɔ’n, nn ɔ te yo tukpacifuɛ’m be juejue te kɔ.

Zezi su kle like wunmiɛn lolɛ cɛn nun. Bla nga amun wun i yɛ’n, tukpaciɛ’n w’a tin i su kpa i afuɛ ko ju blu nin mɔcuɛ (18) yɛ. Ɔ kwlá tinngɛmɛn i wun. Ɔ maan Zezi fɛli i sa fuali bla’n su yoli i juejue!

W’a yoman Ɲanmiɛn ɲrun jranfuɛ mun nin mmla klefuɛ’m be fɛ. Be nun kun kpannin sran’m be su seli kɛ: ‘Cɛn nga be fa be di junman’n ɔ ti cɛn ba nsiɛn, an bla cɛn sɔ’m be nun naan be yo amun juejue, nán an ba wunmiɛn lolɛ cɛn nun kun!’

Sanngɛ Zezi tɛli i su kɛ: ‘?Dunman klofuɛ mun amun nun onin yɛ wunmiɛn lolɛ cɛn nun ɔ ɲannjimɛn i aflunmun m’ɔ o tuin’n nun’n ɔ ko mɛnmɛn i nzue ɔ, yɛ bla nga m’ɔ ti Abraamu anunman m’ɔ kpinndinman i afuɛ 18 (blu nin mɔcuɛ) yɛ’n, yɛ be su kwlá yomɛn i juejue wunmiɛn lolɛ cɛn’n nun ɔn?’ Zezi i ndɛ nga ɔ kannin’n guali sran tɛ sɔ’m be ɲin ase.

I sin’n, Zezi nin i sɔnnzɔnfuɛ’m be tuli ajalɛ be ɔli Zerizalɛmu akpasua liɛ’n su lɔ. Kɛ be jasoli Zeriko klɔ nun’n bé kɔ́’n, aɲinsifuɛ nɲɔn mɔ be srɛsrɛ like be di’n, be tili kɛ Zezi su sin lɛ. Yɛ be kpannin kɛ: ‘Zezi uka e!’

Zezi flɛli be naan w’a usa be kɛ: ‘?Ngue yɛ an klo kɛ n yo man amun ɔn? Be seli kɛ: ‘Nannan tike e ɲin.’ Zezi kannin be ɲinma’n, be ja nun lɛ be wunnin ase! ?Amun si like ti mɔ Zezi yo abonuan sa kwlaa sɔ mun’n? Yɛle kɛ ɔ si be aunnvuɛ yɛ ɔ klo kɛ be lafi i su. I sɔ’n ti’n, e kwla lafi su kpa kɛ, i Sielɛ Blɛ nun’n, sran fi su tɔman tukpaciɛ kun asiɛ’n su wa.