YESU aleposha abalwele konse uko aleya. Abantu balelandapo pali ifi fipesha amano ifyo Yesu alecita mu mishi na mu misumba. E ico abantu baleleta abalemana, impofu na bacibulu na balwele bambi abengi. Yesu alebaposha bonse.

Apa ninshi palipita imyaka ukucila pali itatu ukutula apo Yohane abatishishe Yesu. Kabili Yesu aebele abatumwa bakwe ukuti ali no kuya ku Yerusalemu, uko bali no kumwipaya, kabili pa numa akabuushiwa. Ilyo talaya, Yesu alitwalilile ukuposha abalwele.

Pa bushiku bwe Sabata bumo, Yesu alesambilisha abantu. Pa bushiku bwe Sabata, abaYuda baletuusha. Uyu umwanakashi ulemona pa cikope alilwele sana. Pa myaka 18, ali uwakongama kabili alefilwa ukwiminina bwino bwino. E ico Yesu abikile iminwe yakwe pa mwanakashi kabili atampile ukololoka. E fyo apolele!

Ici calengele intungulushi sha mapepo ukufulwa sana. Umo atendeke ukweba abantu ati: ‘Kwaba inshiku 6 isho tufwile ukubombamo imilimo. Ishi e nshiku isho abantu bafwile ukwisa mu kundapwa, te pa bushiku bwe Sabata iyo!’

Lelo Yesu ayaswike ati: ‘Imwe mwe baume muli babi. Mulakakula impunda pe Sabata no kuitwala ku kunwa amenshi. Bushe uyu umwanakashi uwalwala pa myaka 18 ena te kuti aposhiwe pe Sabata?’ Ifyo Yesu alandile fyalengele aba abantu ababi ukumfwa insoni.

Pa numa, Yesu na batumwa bakwe batwalilile ukuya ku Yerusalemu. Ilyo bashilaingila mu musumba wa Yeriko, abaume bakalombalomba babili kabili impofu baumfwile ukuti Yesu alepita mu musebo. E ico babilikishe abati: ‘Yesu, twafwe!’

Yesu aitile aba baume no kubepusha ati: ‘Cinshi mulefwaya imucitile?’ Bayaswike ati: ‘Mwe Shikulu, Lekeni amenso yesu yatendeke ukumona.’ Yesu abekete mu menso kabili apo pene fye, batampile ukumona! Bushe walishiba ico Yesu alecitila ifi ifipesha amano ifisuma? Ni co alitemenwe abantu kabili alefwaya bamucetekele. Kanshi ilyo Yesu akalateka, takwakabe nangu umo uukalalwala.