Maana 96nan

Yesu ye banabagatɔw kɛnɛya

YESU tun bɛ ka jamana yaala tuma min na, a ye banabagatɔw kɛnɛya. A ye o kabako minnu kɛ, o kuma sera dugu misɛnninw ni dugubaw bɛɛ la. O kosɔn, mɔgɔw nana ni nabaraw, fiyentɔw, tulogerenw ni banabagatɔ wɛrɛw ye walisa Yesu ka u kɛnɛya. Yesu ye o mɔgɔw bɛɛ kɛnɛya.

Kabini Yuhana ye Yesu batise, san saba tɛmɛna sisan. Yesu y’a fɔ a ka cidenw ye ko yan ni dɔɔnin cɛ, a bɛna taa Jerusalɛm, ko u bɛna a faga o yɔrɔ la, nka ko a bɛna lakunun. Nka, sani o ka se, Yesu taara a fɛ ka banabagatɔw kɛnɛya.

Saba don, Yesu tun bɛ ka mɔgɔw kalan. Saba ye Yahutuw lafiya don ye. I ɲɛ bɛ muso min na yan yɔrɔ la, a ka bana tun ka jugu. A tun kurulen bɛ kabini san 18. A tun tɛ se k’i latilen. Yesu ye a bolo da muso kan tuma min na dɔrɔn, a sera ka a yɛrɛ latilen. A kɛnɛyara!

O ye diinɛ ɲɛmɔgɔw dusu bɔ. U dɔ la kelen pɛrɛnna k’a fɔ mɔgɔw ye ko: ‘Tile wɔɔrɔ bɛ yen an ka kan ka baara kɛ. Aw bɛ se ka na o donw na walisa ka kɛnɛya. Nka, aw man kan ka na Saba don na.’

Yesu y’u jaabi ko: ‘Aw mɔgɔjugu ninnu! Aw jɔn tɛ a ka fali foni Saba don na walisa a ka taa a min? Nin muso min banana san 18 kɔnɔ, yala o tun man kan ka kɛnɛya Saba don na wa?’ Yesu ye o kuma min fɔ, o ye o mɔgɔjuguw lamaloya.

Kɔfɛ, Yesu ni a ka cidenw taara Jerusalɛm. U tun bɛ Jeriko dugu dafɛ tuma min na, fiyentɔ fila y’a mɛn ko Yesu bɛ ka tɛmɛ. U pɛrɛnna ko: ‘Yesu, an dɛmɛ!’

Yesu ye u wele k’u ɲininka: ‘Aw b’a fɛ ne ka mun kɛ aw ye?’ U ko: ‘Matigi, anw ɲɛw ka yɛlɛ.’ Yesu magara u ɲɛw na. O yɔrɔnin bɛɛ la, u ye yeli kɛ. Yala i b’a dɔn mun na Yesu ye nin kabakow bɛɛ kɛ wa? Yesu ye o kow bɛɛ kɛ bawo a bɛ mɔgɔw kanu. A b’a fɛ mɔgɔw ka da ale la. O la sa, an bɛ se ka da a la ko tuma min na Yesu bɛna a ka mara kɛ, mɔgɔ si tɛna bana dugukolo kan tun.

Matiyu 15:​30, 31; Luka 13:​10-17; Matiyu 20:​29-34.