JESÚS, neggweburgi bibbirmagdiidgi dule boni nigmalad nudagdii gusa. Bela neggwebur bamaladgi wisguarmala we ibmar dagledisulid imaglediidi. Degisoggu, dulemar na searmala dulemar abgan burgwarmalad, dulemar ibya surmalad geb muyamuya nanamaladi, degine, bamalad bonigan nigmalad. Geb Jesús bela we dulemar nudasa.

Juan, Jesús bautizar imasad aggale, bad birga baa obidde gude. Emisgi Jesús na apóstolmarga soge, Jerusalénse naed owarmagdaniye, geb aa gine oburgwilegoe, degine, sorba gannar durgubaloe. Auggine aa iduar boni nigmalad nudagdii gusmargwele.

We sobaledgi ome be daggedi, 18 años gus degur nanadii, geg inniggi gue. Agala Jesús e argan we ome birgine mesisa, geb ome inniggi gusa. ¡Ome nugunoniggi! We ibmar Jesús sábadog imasa, emar odurdagdigua. Auggine sábadodi judíomarga obunnoged iba.

We ulale babigargi emar idudimalad saeiddoarmala. Wargwena, dulemar buggidar bugmaladga binnasur soggali: ‘Iba nergwa arbaeg ibamar niggad. ¡Aa ibag dulemar nudaglegoed, sábado gindi suli!’.

Auggine Jesús abinsogded: ‘¡Bemar dule isgana gumalad! ¿Ar bemar sábadog asno esigdisurmarsi, geb diig ogobdisurmarsi? Degsoggu, we ome 18 años gusa bonigan abgadiidi, ¿onudaglegedsur be binsamarsi?’. Jesús weyob sogsagua, we dule isganamar binge iddoarmala.

Sorbali, Jesús geb e apóstolmar Jerusalénsig nadmalad. Jericó neggwebur nagabali gudimargua, dule warbo wilemalad ibya surmalad ese binnasur gollarmala: ‘¡Jesús, be anmar bendagge!’.

Geb Jesús, dulemar ibya surmaladse godsagua, ese egissali: ‘¿Ibu an bemarga imagged bemar abege?’. Wemar abinsogdemalad: ‘Dummad, nabir addagge be anmar imagge’. Jesús, we dulemar ibya ebusa, ¡geb yog nabir addagge gusmalad! ¿Be wisi ibigala Jesús we ibmar dagledisulid imasdae? Ar dulemar sabedbali geb dulemar mer e bengumalad abegedba. Wegine anmar durdagge, Jesús reyg Nabbaneggi negdagmai gunoniggi sogele, dule wargwensaale bar uelegosuli.