JAMANA cɛtigɛtɔ, Yezu tun be banabagatɔw kɛnɛya. O kabakow kibaro sera lamini dugudenninw ni dugubaw bɛɛ kɔnɔ. O kama, jama tun be na a fɛ ni murukuw, fiyentɔw, bobow ani banabagatɔ caaman wɛrɛw ye. Yezu tun b’u bɛɛ kɛnɛya.

Yuhana ye Yezu batize a ka ca saan saba ye sisan. Yezu y’a fɔ a ka cidenw ye ko yanni dɔɔni ale bena taga Zeruzalɛmu. O yɔrɔ la, u bena a faga ani a bena lakunu. Sanni o cɛ, Yezu tora ka banabagatɔw kɛnɛya.

Lafiɲɛlon dɔ la, Yezu tun be mɔgɔw kalanna. Yahutuw fɛ baara tun tɛ kɛ o loon na. I ɲɛɛ be muso min na jaa kan, a tun bananin lo kosɔbɛ. A kɔɔ tun kurunin lo kabi saan 18 ani a tun tɛ se ka tilen ka lɔ. O la, Yezu y’a bolo la a kan ani o yɔrɔnin bɛɛ a kɔɔ tilenna. A kɛnɛyara!

O koo ye diinan kuntigiw dimi. U la kelen pɛrɛnna jama kan ko: “An ka kan ka baara kɛ tile wɔɔrɔ kɔnɔ. Aw ka na o loonw na, a k’aw kɛnɛya. Aw kana na lafiɲɛlon na.”

Nka, Yezu y’a jaabi ko: ‘Aw ye mɔgɔ juguw le ye. Lafiɲɛlon na, aw kelen kelen bɛɛ tɛ aw ka fali foni ka taga jii di a ma wa? O la, nin muso tɔɔrɔnin min bananin lo kabi saan 18, yala a daganin tɛ k’a kɛnɛya lafiɲɛlon na wa?’ Yezu ka jaabili ye maloya bila o mɔgɔ juguw la.

O kɔ, Yezu n’a ka cidenw tagara Zeruzalɛmu. U bɔra Zeriko dugu kɔnɔ dɔrɔn, fiyentɔ darikɛla fila y’a mɛn ko Yezu lo be tɛmɛna. O kama, u kulera ko: ‘Yezu, an dɛmɛ!’

Yezu ye fiyentɔ nunu weele k’u ɲininga ko: “Aw b’a fɛ ne ka mun kɛ aw ye?” U ko: “Matigi, an b’a fɛ i k’an ɲaa yɛlɛ.” Yezu magamagara u ɲɛɛw na. O yɔrɔnin bɛɛ, u ye yeli kɛ! I b’a lɔn fɛɛn min kama Yezu y’o kabako cɛɲumanbaw kɛ wa? A y’u kɛ sabu mɔgɔw koo tun ka di a ye ani a tun b’a fɛ u ka la ale la. O la, an be se ka la a la ko a ka mara wagati la, mɔgɔ si tɛna bana tugun dugukolo kan.