NIIYAJÜIN Jesús wayuu eeka ayuulin wanaa sümaa waraittüin nia sainküin mma. Naapüin na wayuukana süchiki tia. Nantitka na ouktakana asaʼa, eeka moʼuin, masaʼain otta waneeinua. Anashii naya nutuma Jesús.

Alatüirü 3 juya süchikijee nuwoutisaajüin Juan Jesús. Nüküjüin Jesús namüin na aluwataaushiikana nuʼunajachin Jerusalénmüin süpüla nuʼutunuin aaʼin otta süchikijee asoʼiraainjatü naaʼin. Süpülapünaa tia niiyajüin Jesús na ayuuishiikana.

Soʼu wanee kaʼi ekirajüshi Jesús soʼu tü kaʼi neemeraakat oʼu na judíokana. Jokotusü sünain waraittaa soʼu 18 juya tü jiet suluʼukat tü ayaakuaakat. Niʼitaaka Jesús najapü saaʼu, lotoko tü wayuukat. ¡Anasü shia nutuma Jesús!

Jashichika na laülaashiikana suluʼu tü ekirajüleekat sutuma tia, namaka namüin na wayuukana: ‹Eesü 6 kaʼi süpüla aʼyatawaa. Eiyajünajat wayuu soʼu tia. Nnojotsü aainjünüinjatüin soʼu tü kaʼi weemeraakat oʼu›.

Nümaka Jesús: ‹¡Mojulaashii jia! Taashisü jutuma jüpüliise süpüla asaa wüin soʼu tü kaʼi jeemeraakat oʼu. Shialeeka nnojoluinjatüin shiiyajünüin tü jiet ayuuikat 18 juya›. Japüika naya sutuma tü nünüikikat.

Mapa nuʼunaka Jesús namaa na aluwataaushiikana Jerusalénmüin. Pejepa naya sünain Jericó, namaka piamashii moʼusalii: ‹Jesús, pümüliaja waya›.

Neenajaka Jesús na moʼusaliikana, nümaka: ‹¿Kasa jüchekaka taaʼinrüin jümüin?› Namaka: ‹Anashii koʼule waya›. Niʼitaaka Jesús najapü sünain noʼu, koʼuka naya. ¿Pütüjaa aaʼu jamüshi naainjaka Jesús kasa pülasü? Shia süka alin nüpüla na wayuukana otta keeʼireesü naaʼin nanoujuin nünain. Shiiʼiyatüin tia nnojoluinjatüin ayuulin wayuu nuluwataapa Jesús saaʼu tü Mmakat.