TAQSIṬ TIS 96

Ɛisa yesseḥlay imuḍan

ƐISA yekka-​d akk tamurt, yesseḥlay imuḍan di mkul amḍiq. Timdinin ţ-​ţudrin meṛṛa yewweḍ-​itent lexbaṛ n lbeṛhanat yexdem. Dɣa lɣaci wwin-​as-​d iquḍaren, iderɣalen, iɛeẓẓugen d waṭas imuḍan nniḍen. Ɛisa yesseḥla-​ten akken ma llan.

Mi ɛeddan telt snin seg wasmi yeţwaɣḍes, Ɛisa yenna i yemceggɛen-​is: ‘Qrib ad ṛuḥeɣ ɣer temdint n Yarucalim. Dinna a yi-​nɣen, umbeɛd a d-​ḥyuɣ si ger lmeggtin.’ Lameɛna uqbel a d-​yas wass-​nni, Ɛisa yeţkemmil yesseḥlay imuḍan.

Yiwet n tikkelt, Ɛisa yella yesselmad deg wass n westeɛfu. Ass n westeɛfu d ass ideg ur ilaq ara ad xedmen Wudayen. Tameṭṭut-​agi i teţwaliḍ dagi tella tehlek mliḥ, tekref meskint. Ih, 18 n sna aya neţţat ur tezmir aţ-​ţesbedd lqedd-​is. Ɛisa issers ihi ifassen-​is fell-​as, dɣa teḥla!

Annect-​agi yesserfa aṭas lɛulama n ddin. Yiwen seg-​sen iɛeggeḍ i lɣaci: ‘Llan seţţa wussan ideg ilaq a nexdem. Ṛuḥet-​ed ihi a kkun-​isseḥlu deg wussan-​nni mačči deg wass n westeɛfu!’

Ɛisa yerra i ineḥkamen-​agi n ddin: ‘D imcumen i tellam. Anwa deg-​wen ur d-​neţserriḥ ara i weɣyul-​is iwakken a t-​yawi ad isew ɣas d ass n westeɛfu? Ihi, ur ilaq ara aţ-​ţaf ḥellu deg wass n westeɛfu tmeṭṭut-​agi i gkerfen 18 iseggasen aya?’ Mi d-​yenna Ɛisa imeslayen-​agi, ixṣimen-​is meṛṛa nneḥcamen.

Iɛedda kra n lweqt, Ɛisa d yemceggɛen-​is ṭṭfen abrid ɣer Yarucalim. Iwakken ad ṛuḥen ɣer dinna, ɛeddan si temdint n Yariḥu. Beṛṛa n temdint-​agi, slan sin iderɣalen belli iɛedda-​d syenna Ɛisa, dɣa bdan ţɛeggiḍen: ‘A Ɛisa, ḥunn fell-​aɣ!’

Ɛisa issawel-​asen, dɣa yenna-​yasen: ‘D acu i tebɣam a wen-​t-​xedmeɣ?’ Rran-​as: ‘A Sidi, efk lameṛ ad ldint wallen-​nneɣ.’ Ɛisa yennul allen-​nsen, imiren kan yuɣal-​iten-​id yeẓri. Teẓriḍ acuɣer yexdem Ɛisa lbeṛhanat-​agi meṛṛa itɛeddan? Axaṭer iḥemmel aṭas imdanen yerna yebɣa ad amnen akk yis. Nezmer ihi a neţkel belli asm’ara yili d agellid, ulac win ara yuɣalen ad ihlek ɣef lqaɛa.

Matta 15:30, 31; Luqa 13:10-17; Matta 20:29-34.