LI JESUS kixbʼaanu li sachbʼachʼoolej re xkʼirtasinkil li tenamit. Naq ebʼ li qas qiitzʼin keʼrabʼi aʼin, keʼxkʼam chaq re li Jesus ebʼ li sik, ebʼ li mutzʼ, ebʼ li yeq roq ut ebʼ li yaj.

Ak kinumeʼk oxibʼ chihabʼ naq li Jesus kisubʼeʼk saʼ haʼ. Chirix chik aʼan, li Jesus kixye rehebʼ li xtzolom naq txik Jerusalen, bʼarwiʼ tkamsiiq ut naq twakliiq wiʼ chik chi yoʼyo. Naq toj maajiʼ nawulak xkutankil li xkamik, inkʼaʼ kixkanabʼ xkʼirtasinkilebʼ li yaj.

Saʼ jun Sabado li Jesus yook xtzolbʼalebʼ li tenamit. Li Sabado jilobʼaal kutan choʼq rehebʼ laj Judio. Abʼan wank jun li ixq 18 chihabʼ xkʼutzkʼuukil rix, joʼkan naq li Jesus kixkʼe li ruqʼ saʼ xbʼeen ut saʼ junpaat kixtutzʼ rix li ixq!

Naq ebʼ laj kʼamol bʼe, saʼebʼ li paabʼal, keʼril aʼin keʼchalk xjosqʼil. Joʼkan naq jun rehebʼ, kixye re li tenamit: ‹Wank waqibʼ kutan re kʼanjelak ut re naq teekʼe eeribʼ chi kʼiraak! Ut li Sabado maawaʼ re kʼirtasink!›

Tojaʼ naq li Jesus kixye rehebʼ: ‹Kʼajoʼ xyiibʼal ru leenaʼlebʼ! Yalaq ani eere, tixjit ut tixkʼam raj li xbʼuur chi ukʼak saʼ li kutan Sabado. Li ixq aʼin, 18 chihabʼ rokik xyajel ut nekeekʼoxla naq inkʼaʼ us xkʼirtasinkil?› Ebʼ li winq keʼxutaanak naq li Jesus kixye aʼin.

Chirix chik aʼan, li Jesus ut ebʼ li xʼapostol kohebʼ Jerusalen. Ak nachʼ wankebʼ chi xkʼatq li tenamit Jerico naq wiibʼebʼ li mutzʼ, keʼok xyeebʼal: ‹Jesus, bʼaanu usilal, chooʼaatenqʼa!›

Li Jesus kixye rehebʼ li mutzʼ: ‹Kʼaru teeraj tinbʼaanu eere?› Tojaʼ naq ebʼ li mutzʼ keʼxye re: ‹At Qaawaʼ, chooʼaakʼe chi ilok›. Naq li Jesus kixchʼeʼebʼ li xnaqʼ ru, saʼ junpaat keʼilok. Ma nakaanaw kʼaʼut li Jesus kixbʼaanu naabʼal li sachbʼachʼoolej? Xbʼaan naq kixrahebʼ li qas qiitzʼin ut re naq kawaqebʼ xpaabʼal chirix. Aʼin naxkʼutbʼesi chiqu naq maaʼani chik yajaq naq li Jesus t-awabʼejinq saʼ li Ruuchichʼochʼ.