OŨRĨA Jesu aathiũrũrũkire bũrũri-inĩ wothe-rĩ, aathire ahonetie arũaru. Ũhoro wa ciama ciake wahunjire icagi-inĩ na matũũra-inĩ mothe. Kwoguo andũ makĩmũrehere ithua na itumumu na itaigua, na angĩ aingĩ arĩa maarĩ arũaru. Nake Jesu akĩmahonia othe.

Rĩu makĩria ya mĩaka ĩtatũ nĩ ĩhĩtũkĩte kuuma Johana abatithie Jesu. Ihinda rĩrĩ Jesu akĩĩra atũmwo ake atĩ o icaikuhĩ nĩegũthiĩ Jerusalemu, kũrĩa aangĩoragĩirũo, na acoke ariũke kuuma kũrĩ akuũ. O na gũkĩrĩ ũguo-rĩ, Jesu aathire na mbere kũhonia arũaru.

Mũthenya ũmwe Jesu aarutanaga kwĩ mũthenya wa Thabatũ. Thabatũ waarĩ mũthenya wa kũhurũkwo nĩ Ayahudi. Mũtumia ũyũ ũrona haha akoretwo arĩ mũrũaru mũno. Ihinda rĩa mĩaka 18 aathiaga ainamĩrĩire, na ndangĩahotire gwĩtiira. Kwoguo Jesu akĩmũigĩrĩra moko, na akĩambĩrĩria kũrũgama. Haiiya, ahonire!

Ũndũ ũcio ũgĩtũma atongoria a ndini marakare buru. Ũmwe wao akĩanĩrĩra he kĩrĩndĩ, ‘He mĩthenya itandatũ ya kũrutwo wĩra. Ĩo nĩyo magĩrĩirũo nĩ kũhonio, no ti mũthenya wa Thabatũ!’

Nowe Jesu akĩmacokeria atĩrĩ: ‘Inyuĩ hinga ici. Githĩ o mũndũ wanyu ndangĩohora ndigiri yake ĩkanyue maĩ mũthenya wa Thabatũ. Mũtumia ũyũ ũtũire e mũrũaru mĩaka 18-rĩ, githĩ ndaagĩrĩirũo nĩ kũhonio mũthenya wa Thabatũ?’ Icokio rĩa Jesu rĩgĩtũma hinga icio iconoke.

Thutha ũcio Jesu na atũmwo ake makĩerekera Jerusalemu. Rĩrĩa maarĩ nja ya itũũra rĩa Jeriko, atumumu erĩ ahoi makĩigua atĩ Jesu nĩaahĩtũkaga. Kwoguo makĩanĩrĩra makiuga: ‘Jesu tũiguĩre tha!’

Nake Jesu agĩĩta atumumu acio, na akĩmoria: ‘Mũkwenda ndĩmwĩke atĩa?’ Nao makĩmwĩra atĩrĩ: ‘Mwathani, tũkwenda maitho maitũ mahingũrũo.’ Jesu akĩmahutia maitho, na kahinda o kau magĩcoka kuona! Wee-rĩ, nĩ ũũĩ gĩtũmi kĩa Jesu kũringa ciama icio cia magegania? Tondũ nĩendete andũ na eendaga magĩe na wĩtĩkio thĩinĩ wake. Na nĩ ũndũ ũcio no tũgakĩgĩa na ma atĩ rĩrĩa agaathana e Mũthamaki gũtirĩ mũndũ ũgacoka kũrũara rĩngĩ.