ပူ ၉၆
ယ့ၣ်ၡူးမၤဘျါပှၤဆူးပှၤဆါတဖၣ် အဂ့ၢ်
ဖဲယ့ၣ်ၡူးဟးဝ့ၤဝီၤဒီကီၢ်ညါအခါ မၤဘျါဝဲပှၤဆူးပှၤဆါတဖၣ်လီၤ. တၢ်ကစီၣ်လၢ အပာ်ဖျါထီၣ် တၢ်လီၤလးတဖၣ်အံၤ ဟူထီၣ်သါလီၤလၢ ဒူသဝီတဖၣ် ဒီးခူဝ့ၢ်တဖၣ်လီၤ. လၢတၢ်န့ၣ်အဃိ ပှၤအစုတဂ့ၤခီၣ်တဂ့ၤတဖၣ်, ပှၤမဲာ်ဘျီၣ်ဒီးပှၤနၢ်တအၢတဖၣ်, ဒီးပှၤဆူးပှၤဆါအဂၤတဖၣ် ဘၣ်တၢ်ဟဲကိးအီၤဆူအအိၣ်လီၤ. ယ့ၣ်ၡူးမၤဘျါက့ၤန့ၢ် အဝဲသ့ၣ်ခဲလၢာ်လီၤ.
ယ့ၣ်ၡူးဘျၢထံလၢယိၤဟၣ်အစုပူၤ အိၣ်လံသၢနံၣ်လံ. ယ့ၣ်ၡူးစံးဘၣ်တဲဘၣ်အတၢ်မၢဖိတဖၣ်လၢ တယံာ်လၢၤဘၣ်န့ၣ် ကဘၣ်လဲၤဝဲဆူယရူၤၡလ့ၣ်, ဒီးမ့ၢ်တုၤဖဲန့ၣ် ကဘၣ်တၢ်မၤသံအီၤ, ဝံၤဒီးကဂဲၤဆၢထၢၣ်သမူထီၣ်က့ၤဝဲ အဂ့ၢ်န့ၣ်လီၤ. ဖဲတၢ်ဘၢၣ်စၢၤအကတီၢ်န့ၣ် ယ့ၣ်ၡူးမၤဘျါဝဲဒၣ် ပှၤဆူးပှၤဆါတဖၣ်န့ၣ်လီၤ.
ဘၣ်တဘျီန့ၣ် ယ့ၣ်ၡူးသိၣ်က့ၤသီက့ၤတၢ်လၢ မုၢ်အိၣ်ဘှံးနံၤန့ၣ်လီၤ. အိၣ်ဘှံးနံၤစံးတၢ်န့ၣ် လၢပှၤယူဒၤ ဖိသ့ၣ်တဖၣ်အဂီၢ်မ့ၢ် မုၢ်နံၤလၢဘၣ်အိၣ်ဘှံးဝဲသ့ၣ်န့ၣ်လီၤ. ပိာ်မုၣ်လၢပထံၣ်အီၤလၢတၢ်ဂီၤအံၤအပူၤန့ၣ် တအိၣ်ဆူၣ်အိၣ် ချ့ယံာ်တ့ၢ်လံလီၤ. အပျိၢ်တကူးဒီး မၤဘျၢဝဲတန့ၢ်ဘၣ်န့ၣ် အိၣ်လံ ၁၈ နံၣ်လံန့ၣ်လီၤ. လၢတၢ်န့ၣ်အဃိ ယ့ၣ်ၡူးပာ်ထီၣ်အစုလၢအလိၤဒီး အဝဲဂဲၤဆၢထၢၣ်ဘျၢထီၣ်ဝဲန့ၢ်လီၤ. အတၢ်ဆါန့ၣ် ဘျါဝဲလံ.
တၢ်ဘူၣ်တၢ်ဘါအခိၣ်တဖၣ် အသးထီၣ်ဝဲသ့ၣ် လၢတၢ်န့ၣ်အဃိလီၤ. လၢအဝဲသ့ၣ်အကျါတဂၤန့ၣ် ကိးပသူထီၣ်ဝဲဒၣ်ကမျၢၢ်လၢ ‘ပကမၤတၢ်အဂီၢ် အိၣ်ဃုသီလီၤ. ဟဲမၤဘျါသုသးလၢ မုၢ်နံၤဝဲန့ၣ်တဖၣ်န့ၣ်တက့ၢ်. တဘၣ်ဟဲလၢအိၣ်ဘှံးနံၤန့ၣ်တဂ့ၤ’ န့ၣ်လီၤ.
ဘၣ်ဆၣ်သနာ်က့ ယ့ၣ်ၡူးစံးဝဲဒၣ် ‘ပှၤအၢပှၤသီတဖၣ် သုဝဲသ့ၣ်ဧၢ, လၢအိၣ်ဘှံးနံၤန့ၣ် သုထုးထီၣ်သုကသ့ၣ်ယီၤ လၢအတဲကူပူၤဒီး ဒုးအီအီၤထံလီၤ တမ့ၢ်ဘၣ်ဧါ. ဒ်န့ၣ်အဃိ လၢအိၣ်ဘှံးနံၤန့ၣ် ပိာ်မုၢ်လၢအဆိးက့ ၁၈ နံၣ်တဂၤအံၤ တကြၢးဒိးဘၣ်တၢ်မၤဘျါအီၤန့ၣ်ဘၣ်ဧါ.’ မ့ၢ်လၢယ့ၣ်ၡူး သံကွၢ်ပှၤသူၣ်အၢသးသီတဖၣ်ဒ်န့ၣ်အဃိ ပှၤတဖၣ်န့ၣ်မဲာ်ဆှးဝဲသ့ၣ်လီၤသၢၣ်.
လၢခံန့ၣ် ယ့ၣ်ၡူးဒီးအတၢ်မၢဖိတဖၣ် လဲၤဝဲသ့ၣ်ဆူ ယရူၤၡလ့ၣ်န့ၣ်လီၤ. ဖဲအတုၤဝဲသ့ၣ်လၢ ဝ့ၢ်ယရံၤဃိအချၢဒံးအခါန့ၣ် ပှၤမဲာ်ဘျီၣ်လၢအဃ့အီၣ်အဆၣ်ခံဂၤ နၢ်ဟူဝဲသ့ၣ်ယ့ၣ်ၡူးဟဲခီဂာ်ဒီး ကိးပသူထီၣ်ဝဲသ့ၣ် ‘သူၣ်ကညီၤသးကညီၤ ဒီးမၤစၢၤပှၤတက့ၢ်’ န့ၣ်လီၤ.
ယ့ၣ်ၡူးကိးပှၤမဲာ်ဘျီၣ်ခံဂၤဒီး သံကွၢ်ဝဲဒၣ် ‘သုအဲၣ်ဒိးလၢ ယကမၤန့ၢ်သုမနုၤလဲၣ်’ န့ၣ်လီၤ. အဝဲသ့ၣ်စံးဆၢက့ၤ ‘ကစၢ်ဧၢ, မၤကပီၤထီၣ်က့ၢ်န့ၢ်ပမဲာ်ချံတက့ၢ်.’ ယ့ၣ်ၡူးထိးအဝဲသ့ၣ်အမဲာ်ချံဒီး အမဲာ်ချံဟဲက့ၤကပီၤထီၣ်တဘျီဃီန့ၣ်လီၤ. ဘၣ်မနုၤ ယ့ၣ်ၡူးမၤတၢ်လီၤလးဒီး ပာ်ဖျါထီၣ်အစိကမီၤဒ်အံၤန့ၣ်လဲၣ်န့ၣ် သုသ့ၣ်ညါဧါ. မ့ၢ်လၢအအဲၣ်ဝဲပှၤကညီတဖၣ်ဒီး အဲၣ်ဒိးလၢအဝဲသ့ၣ်ကနာ်အီၤအဃိလီၤ. ဒ်န့ၣ်အဃိ ယ့ၣ်ၡူးမ့ၢ်ကဲစီၤပၤအခါ လၢဟီၣ်ခိၣ်အံၤန့ၣ် တမ့ၢ်လၢပှၤကဆူးကဆါလၢၤဘၣ်န့ၣ် သပှၢ်ကတၢၢ်လီၤ.
