Icisimicisyo 96: BaYesu Baposya Abalwasi
ILI baYesu balukwendaenda mu calo, balukuposya abalwasi. Ilyasi pali fifi ifimpelampela lyalabilwapo mu misi na mu matauni monse. Popele abantu baleta kuli bo ifilema, impofu, abasinkile amatwi na bambi abengi abalwasi. Kabili baYesu babaposya bonse.
Imyaka ukucila pali itatu pano yapitapo ili Yoane abatisye baYesu. Kabili baYesu babula intangisi syabo ati bukumo bakaya ku Jelusalemi, uku bakepaiwa, eli bakabusiwe ukufuma ku bafwile. Pa mpindi iyi baYesu batwalilila ukuposya abalwasi.
Kambi kasuba baYesu balukusambisya pa Sabata. Pa Sabata e kasuba ka kutusya ku baJuda. Umwanakasi ulukubona apa aalukulwala ukwakuti. Pa myaka 18 alyongomene, kabili alukufilwa ukwinuka. Popele baYesu babikapo amaboko abo pali ye, naye atatikako ukwinuka. Aposiwa!
Ici calenga intangisi sya mapempelo ukukalipa. Imo pali syo yabilikisya kwi bumba ati: ‘Kuli insiku sisanu na bumo isyelelwe ati tulukupyungamo. Syesyo e nsiku isyakwisa mu kuposiwa, tesi pa Sabata!’
Pano baYesu baasuka ati: ‘Mwe balalume imbifi. Uuli onse pali mwebo angakakulula imbongolo yakwe ne kuitwala mu kunwa amenda pa Sabata. Popele woyo umwanakasi umupengele, uwalukulwala pa myaka 18, kani tacelelwe ukumuposya pa Sabata?’ Ukwasuka kwa baYesu kwalenga aba balalume imbifi ukuba ne nsoni.
Mukukonkapo baYesu ne ntangisi syabo baya balola ku Jelusalemi. Ili bafika lukoso posonde ye tauni lya Jeliko, impofu sibili isyakulombaisya syaumfwa ati baYesu balukupita. Popele syabilikisya ati: ‘BaYesu, tofweni!’
BaYesu baite’mpofu, ne kwipusya ati: ‘Mba nifindo mulukufwaya ati mucitileni?’ Kasilabila ati: ‘BaSikulu, amenso esu asibulwe.’ BaYesu baikatapo pa menso asiko, kabili penka’po syatatika ne kubona! Mba wawisiba umulandu baYesu bacitila fyonse’fi ifimpelampela ifiweme? Nipakuti balitemenwe abantu kabili balukufwaya ati babacetekele. Namulifyefyo tungacetekela ati ili bakateka koti ni Mfumu takukabapo uukalwala pa calo nakabili.
Matayo 15:30, 31; Luku 13:10-17; Matayo 20:29-34.
Ifyakwipusya
- Kani nifindo baYesu bacita ili balukwendaenda mu calo?
- Imyaka itatu panuma baYesu babatisiwe, kani nifindo babula abasambile babo?
- Kani abantu abali mu cikope nibani, kabili nifindo baYesu bamucitila umwanakasi?
- Mba nindo ifi baYesu baasuka intangisi sya mapempelo isyalukubapikisya fyasilengela ukuba ne nsoni?
- Ili baYesu ne basambile babo bapalamina ku Jeliko, mba nifindo baYesu bacita ku mpofu sibili isyalukulombaisya?
- Mba nindo baYesu bacitila ifimpelampela?
Ifyakwipusya na fimbi
- Pendeni Matayo 15:30, 31.
Kani amakosa abaYehoba aakukankamika alibonekeele syani muli baYesu, kabili’ci cingatofwa syani ukumfwikisya ifi baYehoba balaile ukucita mu calo ca bukumo? (Amasa. 37:29; Yisa. 33:24)
- Pendeni Luku 13:10-17.
Kani bucine bwa fimpelampela ifikulu ifyacitile baYesu pa Sabata filalangisya syani ifi bakasangalasya abantunsi mu Kuteka kwabo ukwa Myanda Ikumi? (Luku 13:10-13; Amasa. 46:9; Mat. 12:8; Kolo. 2:16, 17; Fis. 21:1-4)
- Pendeni Matayo 20:29-34.
Kani ili lyasi lilalangisya syani ati nangaba’ti baYesu balikwete ifyakucita ifingi balukufwaya ukofwa abantu, kabili nifindo tungasambililako kuli cici? (Ndute. 15:7; Jako. 2:15, 16; 1 Yoa. 3:17)
