TEJ nbʼettoq Jesús tuj tnam, in che kubʼtaq tqʼanin yabʼ. Ok bʼiʼn tqanil jlu kyojele tnam nqayin ateʼ. Tuʼntzunju, e pon kyiʼn qe xjal aqejo xjal tzkaj kyten, qe moẍ, ex qe kox, ex nimkutl yabʼ, kykyaqil qe jlu e bʼanix tuʼn Jesús.

Ma tzikʼ mas oxe abʼqʼi tjawlen aʼ twiʼ Jesús tuʼn Juan. Xi tqʼamaʼn Jesús kye t-apóstol qa chʼixteq t-xi toj Jerusalén, atztaq kbʼel bʼiyoʼn, ex kjawel itzʼji juntl maj kyxol kyimne. Tuj ambʼil aju kukxteq in che kubʼ tqʼanen yabʼ.

Jun maj, in xnaqʼtzantoq Jesús tuj jun sábado. Aju sábado in najbʼentaq kyuʼn judiy tuʼn kyajlan. Aju xuʼj tkuʼx tuj tilbʼilal tzkajtoq taʼ t-xmilal, moqa nya jiqintaq taʼ ttzal tiʼj, iqʼinteq 18 abʼqʼi tuʼn. Kyjuʼtzun kubʼ tqʼoʼn Jesús tqʼabʼ tibʼaj ex jiqimax tiʼj xuʼj. ¡Qʼanet xuʼj lu!

E jaw qʼojle qe nejenel kye okslal tuʼn jlu. ‹Oʼkx tuj qaq qʼij bʼaʼn tuʼn qaqʼanan›, chi jun nejenel xi tqʼamaʼn kye xjal. ‹Aqetzun qʼij jlu bʼaʼn tuʼn kyule qʼanel kyibʼe, ex nya tuj sábado›.

Xitzun ttzaqʼweʼn Jesús: ‹Xmeletzʼ qeye, ¿maj mintiʼ jun kyeye nel tpujuʼn tchej ex nxi tiʼn kʼal aʼ tuj sábado? ¿Yejtzun te xuʼj lu myapelo bʼaʼn tuʼn tqʼanit, quʼn ma tzʼelxi 18 abʼqʼi ttzajlen tyabʼ?› Tzaj kychʼixwi nejenel tuʼnju xi tqʼamaʼn Jesús kye.

Tbʼaj jlu, tzyet juntl maj bʼe tuʼn Jesús kyukʼe t-xnaqʼtzbʼen tuʼn kykanin tuj Jerusalén. Tej nqateq ateʼ ttxlaj Jericó, i etz kabʼe moẍ ex e jaw ẍchʼin kyjalu: ‹Aya Jesús, qo tonintze›.

E tzaj ttxkoʼn Jesús ex xi tmaʼn kye: ‹¿Alkye kyajbʼile tuʼn tkubʼ nbʼinchaʼne kyeye?› Xitzun kyqʼamaʼn qe moẍ te: ‹Qajbʼile tuʼn tjaqet qwitze›. Oktzen tmakoʼn Jesús tbʼaqʼ kywitz, ¡ex jun rat naj jaqet kywitz! ¿Ojtzqilaʼn tuʼne tiquʼn e bʼent nim milagro tuʼn Jesús? Tuʼnjo kʼujlaʼnqetoq xjal tuʼn ex tajbʼiltaq tuʼn tok qʼuqeʼ kykʼuʼj tiʼj. A jlu ntzaj tqʼuqbʼaʼn qkʼuʼj qa tjaqʼ tkawbʼil mi aʼltl jun xjal kyabʼtel.