Jesús okinpajti akinmej omokokoayaj
TLAPOUALISTLI 96
Jesús okinpajti akinmej omokokoayaj
IJKUAK Jesús yaui itech nochi ueyi altepetl, kinpajtia akinmej mokokoaj. Itech oksekimej altepemej kimatij ken Jesús kinpajtia akinmej mokokoaj. Ik non, tlaltikpaktlakamej kiuikiliaj koxomej, akinmej amo tlachiaj uan oksekimej akinmej mokokoaj. Uan Jesús kinpajtia nochtin.
Yopanokej kanaj eyi xiuitl ijkuak Juan okiapolakti Jesús. Uan Jesús okinmilui itlatitlaniluan amo miak kauitl opoliuiaya pampa ye yaskia Jerusalén, kanin kimiktiskiaj, uan satepan toTajtsin Dios kiyolitiskia. Maski ijkon, ye ok okinpajtiaya akinmej omokokoayaj.
Se tonal sábado Jesús otlamachtijtoka. Itech tonal sábado judíos omoseuiayaj. Siuatl tlen nikan tikita, yokipiaya 18 xiuitl amo ueli omomelauaya. Ik non, Jesús okitlali imauan ipan nin siuatl uan omoyektlali. ¡Jesús okipajti!
Ik non, tlayekankej teopixkamej okualankej miak. Se tlayekanki okinmilui nochtin tlaltikpaktlakamej tlen ompa okatkaj: ‘Itech chikuase tonalmej uelis titekitiskej. ¡Itech non chikuase tonalmej uelis timopajtiskej, amo itech tonal sábado!’.
Maski ijkon, Jesús okinankili: ‘¡Amo nanyolkualmej!’. Nochtin namejuan nankitotomaskiaj nanmoburro uan nankiuikaskiaj pampa ma atli itech tonal sábado. Ik non, ¿amo omonekiaya ma nikpajti nin siuatl, tlen yokipiaya 18 xiuitl omokokoaya? Ninmej tlakamej omopinatijkej ijkuak Jesús ijkon okinnankili.
Satepan, Jesús uan itlatitlaniluan oyajkej Jerusalén. Ijkuak oajsitokaj itech altepetl Jericó, ome tlakamej tlen amo otlachiayaj okikakej Jesús ompa opanotoka uan otsajtsikej: ‘Jesús, xitechpaleui’.
Jesús okinnotski akinmej amo otlachiayaj, uan okintlajtlani: ‘¿Tlen nankinekij ma namechchiuili?’. Yejuan okiluijkej: ‘ToTeko, xikchiua ma titlachiakan’. Jesús okitlali imauan ipan inmixtololouan, ¡uan san niman opejkej tlachiaj! ¿Tikmati tleka Jesús okichi nochtin ninmej milagros? Pampa ye okintlasojtlaya nochtin tlaltikpaktlakamej uan noijki okinekiaya ma tlaneltokakan itech ye. Nin techmachtia ken ijkuak ye ualtlanauatis itech Tlaltikpak ayakmo akaj mokokos.
Mateo 15:30, 31; Lucas 13:10-17; Mateo 20:29-34.
