Historia 96

Jesús kinpajtia kokoxkej

IJKUAK Jesús panouaya ipan país, kinpajtia kokoxkej. Ipan miyek kalpamej tlen nisiu nokauaj kimatij itech yejuin milagros. Ika yejon, tlaltikpakchanejkej kinuikiliaj akin sepoujtokej, akin xuelij nejnemij, akin xtlachiaj iuan akin xtlakakij, noijki okseki miyekej kokoxkej. Niman Jesús nochimej kinpajtia.

Yopanok ipantsin yeyi xiuitl ijkuak Juan okiapolakti Jesús. Niman Jesús kimijlia itlatitlankauan ika sa xuejkauis yas Jerusalén, kampa kimiktiskej, niman ika nokuiteuas intsajlan akin yomijkej. San ika, xkikajkauaya ika kinpajtia kokoxkej.

Jesús tlamachtijtoya ipan tonajli sábado. Sábado katka se tonajli ijkuak judíos xtekitij. Siuatl akin tikita nikan, kipiaya 18 xiuitl ika xueliya kuajli notelketsaya. Ika yejon, Jesús kintlalia imauan ipan, niman aman kema ueli notelketsa. ¡Yejuin siuatl pajti!

Yejuin kichiua ika tlamachtijkej ipan tlanauatijli makualanikan. ‘Onka chikuasen tonajli ijkuak se uelis tekitis’, tsajtsi se akin tlamachtia ipan tlanauatijli. ‘¡Ipan yejon tonaltin uelis timopajtis, niman maka ipan sábado!’

San ika, Jesús tlanankilia: ‘¡Xnenyolkualmej! Nikmatstika ika nemejuamej nenkitotomaskiaj nemopoloko niman nenkonatlitiskiaj ipan sábado. Ika yejon, ¿xkinamiki mapajti yejuin siuatsintli, akin kuika 18 xiuitl ika nokokoua?’ Tlen okinnankili okinpinaujti yejuin tlakamej akin xkuajli inyojlo.

Sakin, Jesús niman itlatitlankauan yauej Jerusalén. Ijkuak sa nisiu ajsiskej ipan ueyikalpan Jericó, omemej akin xtlachiaj tsajtsij: ‘Jesús, xtechpaleui’.

Jesús kinnotsa akin xtlachiaj, niman kintlajtoltia: ‘¿Tlenon nenkinekij manimexchiuili?’ Yejuamej kijtouaj: ‘ToTeko, xchiua matitlachiakan’. Jesús kintlalia imauan ipan imixtololojuan, ¡nimantsin ueli tlachiaj! ¿Tikmatstika tleka Jesús kichiua nochi yejuin milagros? Pampa kintlasojtla tlaltikpakchanejkej niman kineki makineltokakan. Yejuin techititia ika ijkuak yejua tekiuajtis, ipan tlaltikpaktli xakaj oksejpa kipiyas kokolistli.

Mateo 15:​30, 31; Lucas 13:​10-​17; Mateo 20:​29-​34.