Ekitebyo 96

Yesu Okutambira Abarwaire

YESU omu kugyendagyenda kwe omu nsi, akaba agyenda naatambira abarwaire. Amakuru g’eby’okutangaaza ebi gagambwaho omu byaro n’omu ndembo ezihereine. N’ahabw’ekyo abantu bamureetera abo abazingami n’empumi n’ebifa-matu, hamwe n’abandi baingi abarwaire. Yesu kandi abatambira boona.

Hati emyaka erikurenga omuri eshatu ehingwireho okwiha obu Yohaana yaabatiza Yesu. Kandi Yesu naagambira entumwa ze ngu jubajuba naaza kuza Yerusaalemu, ei araije kwitirwa, kandi na bwanyima azookye kuruga omu bafu. Ekyo kitakabaireho, Yesu aguma naatambira abarwaire.

Eizooba rimwe, Yesu akaba naayegyesa aha eizooba rya Sabato. Sabato n’eizooba ry’Abayudaaya ery’okuhuumuriraho. Omukazi ou orikureeba aha atwire arwaire munonga. Okumara emyaka 18, atuura azingazingirwe, kandi akaba atarikubaasa kwemerera agororokire. N’ahabw’ekyo, Yesu amutaho emikono ye, kandi omukazi atandika kugororoka. Akira!

Eki kireetera abeebembezi b’ediini kugira ekiniga. Omwe aharibo agambira omutwe muhango gw’abantu n’eiraka rihango ati: ‘Hariho ebiro mukaaga ebishemereire kukorerwamu emirimo. Nibyo biro by’okwiziramu kutambirirwamu, hatari aha Sabato!’

Kwonka Yesu abagarukamu ati: ‘Imwe bashaija babi ‘mwe. Buri omwe omuriimwe mwena naasibura endogoya ye kandi agitwara kugyeshera aha Sabato. Mbwenu ogu mukazi omunaku, otwire arwaire kumara emyaka 18 tashemereire kutambirwa aha izooba rya Sabato?’ Yesu okugarukamu atyo kureetera aba bashaija babi kushwara.

Bwanyima Yesu n’entumwa ze bagyenda boorekyera Yerusaalemu. Ku baba bakiri aheeru ya Yeriko, empumi ibiri kandi abasheegi bahurira ngu Yesu ariyo naahingura. Batyo beeta nibagira bati: ‘Yesu, tuhwere!’

Yesu ayeta empumi ziija ahu ari, atyo azibuuza ati: ‘Nimwenda ngu mbakorere ki?’ Bamugarukamu bati: ‘Mukama waitu, nitwenda ngu amaisho gaitu gahumuukye.’ Yesu akwata aha maisho gaabo, kandi ahonaaho batandika kureeba! Noomanya ahabw’enki Yesu naakora eby’okutangaaza ebi byona? N’ahabw’okuba naakunda abantu kandi naayenda ngu bagire okwikiriza omuri we. Mbwenu nitubaasa kuhamya ngu ku aritandika kutegyeka nk’Omugabe omu nsi, tihaine n’omwe omu nsi origaruka kurwara.

Matayo 15:30, 31; Luka 13:10-17; Matayo 20:29-34.