MEKƐ mɔɔ Gyisɛse luolua azɛlɛ ne azo amuala la, ɔyɛle wuleravolɛma ayile. Bɛhanle nwanwane gyima ɛhye mɔ anwo edwɛkɛ wɔ azua nee namunamu mɔɔ bikye la kɔsɔɔti azo. Yemɔti menli vale abuburama nee anyezinlirama nee mumule, yɛɛ menli dɔɔnwo mɔɔ ɛnde kpɔkɛ la rale. Na Gyisɛse yɛle bɛ muala ayile.

Dwɔn zɔnenle Gyisɛse la, ɛvolɛ mɔɔ bo nsa la akee ɛkpa nwo. Na Gyisɛse hanle hilele ye ɛzoanvolɛma ne kɛ ɔnrɛhyɛ ɔbahɔ Gyɛlusalɛm, ɛleka mɔɔ bɛbahu ye, na akee yeadwazo yeavi ewule nu la. Kolaa na zɔhane deɛ ne azi la, Gyisɛse hɔle zolɛ yɛle wuleravolɛma ne ayile.

Ɛnwomenlelielɛ kenle ko bie ɛnee Gyisɛse ɛlɛkilehile. Ɛnwomenlelielɛ kenle ne le kenle mɔɔ Dwuuma ɛngɔ ɛleka anzɛɛ bɛnyɛ gyima a. Raalɛ ne mɔɔ ɛnwu ye ɛke la ɛnde kpɔkɛ fee. Yekpo kondokondo mɔɔ ɔngola ɔ nwo tenrɛ fee wɔ ɛvolɛ 18 anu. Yemɔti Gyisɛse vale ɔ sa guale ɔ nwo zo, na ɔdenrɛle ɔ nwo fɔɔnwo. Yede kpɔkɛ!

Ɛhye manle ɛzonlenlɛ nu adekilevolɛma ne vale ɛya. Bɛ nuhua ko zele menli ne kɛ: ‘Yɛlɛ kenle nsia mɔɔ ɔwɔ kɛ yɛfa yɛyɛ gyima a. Yemɔti bɛrɛla kenle zɔhane mɔ bɛmaa bɛyɛ bɛ ayile, na bɛgyakyi Ɛnwomenlelielɛ kenle ne bɛmaa ɔla ɛkɛ ne!’

Noko Gyisɛse buale kɛ: ‘Bɛmɛ nabalabama. Saa ɔdwu Ɛnwomenlelielɛ kenle a bɛ biala sianyi ye asoaso ɔfa ye ɔkɔmaa ye nzule. Na raalɛ ɛhye mɔɔ anwo yɛ anwunvɔne, mɔɔ anwo ɛdo ye ɛvolɛ 18 la, yɛɛ ɔnle kɛ bɛyɛ ye ayile wɔ Ɛnwomenlelielɛ kenle a?’ Gyisɛse mualɛ ne manle nabalabama ɛhye mɔ anyunlu guale aze.

Nzinlii Gyisɛse nee ye ɛzoanvolɛma ne doale bɛ adendulɛ ne azo kɛ bɛkɔ Gyɛlusalɛm. Mɔɔ bɛdɛlale Gyɛleko ekyii ala la, anyezinliravolɛma nwiɔ mɔɔ sɛlɛzɛlɛ ezukoa la dele kɛ Gyisɛse ɛlɛpɛ nuhua. Yemɔti bɛdeɛdeanle nuhua kɛ: ‘Gyisɛse, boa yɛ!’

Gyisɛse vɛlɛle anyeziliravolɛma ne, na ɔbizale bɛ kɛ: ‘Duzu a bɛkulo kɛ meyɛ memaa bɛ a?’ Bɛhanle kɛ: ‘Awulae, yɛkulo kɛ ɛbuke yɛ nye.’ Gyisɛse vale ɔ sa hehanle bɛ nye ne mɔ, na ɛkɛ ne ala bɛholale bɛnwunle debie! Ɛze deɛ mɔɔ ɔti Gyisɛse yɛle nwanwane ninyɛne mgbole ɛhye mɔ amuala la ɔ? Ɔluakɛ ɔkulo menli na ɔkulo kɛ bɛnyia diedi wɔ ye nu la ati ɔ. Na yɛkola yɛdie yɛdi kɛ saa ɔdi tumi kɛ Belemgbunli a awie biala mɔɔ wɔ azɛlɛ ye azo la anwo ɛnrɛdo ye bieko.