IA IESU e aere ra na roto i te enua, kua rapakau aia i te maki. Kua akakiteia te nuti o teia au temeio ki roto i te au oire e te au taoni e pini ua ake. No reira kua apai mai te tangata kiaia i te aronga pirikoki, matapo e te turi, e te au tangata e manganui tei maki. Kua rapakau a Iesu ia ratou pouroa.

Kua pou e tere atu te toru mataiti i teianei, i te papetito anga a Ioane ia Iesu. E kua akakite a Iesu ki tana au apotetoro e kare e roa atu ana ka aere aia ki Ierusalema, te ngai ka tamateia aia, e ka tu akaou mai mei te mate. I teia taime ra, kua rapakau ua atu a Iesu i te maki.

Tetai ra kua apii a Iesu i te ra Sabati. Te Sabati e ra akangaroi no te ngati Iuda. Ko te vaine taau e kite ra i konei i maki maata ana aia. Kua piko roa aia ki raro no tetai 18 mataiti, e kare e rauka kia tu tikatika ki runga. No reira kua tuku a Iesu i tona rima ki runga iaia e kua akamata te vaine i te tu ki runga. Kua ora aia!

Kua maani teia i te au arataki akonoanga kia riri. ‘E ono ra ka tau tatou kia angaanga,’ i ava mai ei tetai ia ratou ki te pupu tangata. ‘Ko te reira te au ra ka aere mai no te rapakau, kare i te ra Sabati!’

Inara kua pau atu a Iesu e: ‘E au tangata kino kotou. Ka tatara tetai ia kotou i tana atini e ka apai ki vao kia akainu ki te vai i te ra Sabati. Eaa i reira kore ei teia vaine tei maki ana e 18 mataiti, ka kore ei e rapakauia i te ra Sabati?’ Kua taakama te paunga a Iesu i teia au tangata kino.

Muri mai kua aere atu a Iesu e tana au apotetoro ki Ierusalema. Ia ratou i vao ake i te oire o Ieriko, kua akarongo mai e rua nga tangata patipati matapo ia Iesu e aere akera. No reira kua ava ratou e: ‘E Iesu, tauturu mai ia matou!’

Kapiki atu a Iesu i te au tangata matapo kia aere mai, e kua ui atu e: ‘Eaa ta kotou ka inangaro iaku kia rave no kotou?’ Karanga ratou e: ‘E te Atu, e akapuera ana i to matou mata.’ Kua amiri a Iesu i to ratou mata, e i te reira taime rai kua kite ratou! Kua kite koe e eaa a Iesu i rave ei i teia au temeio umere pouroa? No te mea e inangaro ana aia i te tangata e ka inangaro aia ia ratou kia rauka te akarongo i roto iaia. No reira ka papu ia tatou e me tutara aia ei Ariki kare e tangata e maki akaou i runga nei i te enua.