YESUUSI mariwa baala, xiwantinore hursino. Isi assino maalale duduwi qooxeessaho noo olliiranna katamma baalate duduwami. Konni daafira mannu naafoota, balloota, danqootanna xiwantinore wole lowo mannoota Yesuusiwa abbi. Yesuusino baalanka hursinsa.

Yohaannisi Yesuusa cuuinku sasu diri saino. Yesuusi hawaariyaatesira mulenni Yerusaalame haˈrannota, hakko shinannisitanna hakkiinnino reyotenni kaˈˈannota kulinsa. Haˈra geeshsha kayinni xiwantinore hursanni keeshshi.

Mitto barra Yesuusi Sambatunni rosiisanni no. Yihudu mannira Sambatu fooliishshote barraati. Tini laˈˈatto mancho lowo geeshsha xiwantino. Ise 18 diro woˈma ukkite keeshshitino; hossi yite uurrite diaffanno. Konni daafira Yesuusi angasi aanaho woreenna hurte hossi yite uurritu!

Kuni coyi ammaˈnote cimeeyye hanqisi. Insa mereerinni mittu hanqe, gamba yiino manna togo yii: ‘Loosiˈnannihu lewu barri no. Konni daafira xiwaniˈnenni hura hasiissannoˈnehu hakko barra ikkiina Sambatunni ikka dihasiissannosi!’

Ikkollana Yesuusi togo yee qoli: ‘Kiˈne bushuullu, mereeriˈnenni Sambatunni harrichchosi tire waa hayikkisannokkihu no? Ikkina tini buxichcho mancho 18 diro woˈma xiwantinoti hura dihasiissannose?’ Yesuusi qolino dawaro konne bushuulle manna saalfachchishshu.

Yannate gedensaanni Yesuusinna hawaariyaatesi Yerusaalame hadhu. Hadhanni Iyyaarkote katama saˈuta, lamu ballootu huucciˈraano Yesuusi saˈˈanni noota macciishshitu. Hakkiinnino qoonqonsa gotti assite, ‘Yesuusa kaaˈlinke!’ yitu.

Yesuusino balloota woshshe, ‘Marichcho assammoˈnera hasidhinanni?’ yee xaˈminsa. Insano, ‘Mootichcha, illenke faninke’ yitu. Yesuusino illensa amammadi; insano hakkawotenni laˈu! Yesuusi tenne hagiirsiissanno maalale baala assinohu mayiraatiro afootto? Korkaatuno manna baxanno daafiraatinna mannu iso ammaˈnanno gede hasiˈreeti. Qoleno isi Nugusa ikke moohanno yannara uullate aana layinkita mittuno xiwamannokkita afa dandiineemmo.