NGESIKHATSI Jesu ahamba kulo lonkhe live, abephilisa labagulako. Kuwo onkhe emadolobha nemitana, kwakukhulunywa ngato letimangaliso takhe. Ngako-ke bantfu beta kuye baletse labakhubatekile, labangaboni emehlweni, labangeva etindlebeni kanye nalabanye labanyenti labebagula. Jesu wabaphilisa bonkhe.

Kwasekuphele iminyaka lemitsatfu Johane abhabhatisa Jesu. Jesu watjela baphostoli bakhe kutsi bese atawukhuphukela eJerusalema, lapho abetawubulawa khona, aphindze avuke emathuneni. Ngalesosikhatsi wachubeka elapha labagulako.

Ngalelinye lilanga Jesu abefundzisa ngelilanga leliSabatha. LiSabatha kwakulilanga lemaJuda lekuphumula. Lomfati lombona lapha abesagule kakhulu. Abegobene sikhatsi lesidze lesiminyaka lengu 18, futsi angakhoni kuma acondze. Ngako-ke Jesu wambeka tandla wamphilisa, futsi masinyane wacala kuma acondze.

Loku kwabatfukutselisa kakhulu baholi benkholo. Lomunye wabo wakhuluma kubantfu atfukutsele, watsi: “Asitfupha emalanga lesifanele sisebente ngawo; ngako-ke nibota ngalawo malanga kutewuphiliswa, kodvwa hhayi ngeliSabatha!”

Jesu wabaphendvula watsi: ‘Nine batentisi! Lomunye wenu angeke ayikhipha yini imbongolo esibayeni ayeyinatsisa ngeliSabatha? Ngako-ke akukafanele yini kutsi lomfati lobekagula iminyaka lengu 18, aphiliswe ngeliSabatha?’ Lemphendvulo yaJesu yabenta baba nemahloni.

Jesu wase uyahamba nebaphostoli bakhe baya eJerusalema. Basengaphandle kwemuti waseJerikho, timphumphutse letimbili letatihleti eceleni kwemgwaco, teva kutsi nguJesu lona lowengcako. Tase tiyamemeta titsi: ‘Jesu, sisite!’

Jesu watibita, wase uyatibuta watsi: “Nifuna nginenteleni?” Tatsi kuye: “Nkhosi, sifuna kutsi emehlo etfu avuleke.” Jesu watitsintsa emehlo, tase tiyabona masinyane! Uyati yini kutsi kungani Jesu enta tonkhe letimangaliso? Kungoba abebatsandza bantfu, futsi afuna bakholwe nguye. Ngako-ke singaciniseka kutsi lapho sekayiNkhosi, kute lotawuphindze agule emhlabeni.