E̱R YESU lu zenden ken tar la cii la, lu been ior angev. Ibaver i uivande mban ne i̱ samber ken angarev mbakiriki man mbavesen mba hen ningir la cii. Nahan ior va a mbasombonangahar kua mbaapirashe man mbakondonato, kua mbagenev kpaa kpishi mba ve lu uange yô. Man Yesu bee ve cii angev.

Anyom kar hegen hemba atar e̱r yange Yohane e̱r Yesu batisema kera yô. Nahan Yesu kaa a mbahenen nav er shi kpeghee tsô una yem ken Yerusalem, ape a za wua un, man shi una nder shin mbakpenev la. Hen shighe u hegen ne yô, Yesu za hemen u been ior angev.

Iyange igen yô Yesu lu tesen sha Iyange i Memen. Iyange i Memen la ka iyange i mmem sha ci u Mbayuda. Kwase u ú nenge a na heen ne ngu uange kpishi je. A kôvor a lu hen inya anyom 18, nahan faantyô u naregh sha ga. Tsô Yesu penda uwegh nagh sha a na, man a hii u naregh sha. Angev mbula mbu bee!

Kwagh ne na asema vihi mbahemenev mba kwaghaôndo mbara kpishi. ‘Ayange nga ataratar a i gbe u se er tom yô,’ môm ken ave ngor ikenge ôr a ikpelaior nahan. ‘Ka ken ayange la ma ne va sha u i̱ bee ne angev ye, ka sha Iyange i Memen ga!’

Kpa Yesu na mlumun er: ‘Ne aferaior ne. Hanmô wen cii nana sagh jaki i nan nana due a i̱ sha u i̱ ma mngerem sha Iyange i Memen. Nahan doo u icankwase, u a lu uange anyom 18 ne, i̱ bee un angev sha Iyange i Memen ga he?’ Ikar i Yesu na la i̱ hee aferaior ne.

Ken hemen yô Yesu kua mbahenen nav ve mough ve yem ken Yerusalem. Shighe u mba za zulum ikua a gar u Yeriko yô, mbaapirashe uhar ve ungwa ér Yesu ngu karen. Nahan ve gba genger amo kaan er: ‘Yesu, shi yima se!’

Yesu yila mbaapirashe mbara her a na, tsô a pine ve er: ‘Ka nyi ne soo ner m̱ er sha ci wen-e?’ Ve kaa er: ‘Tere, er ashe a ase a̱ bugh.’ Yesu bende ve ave sha ashe, man hen shighe la je ve fatyô u nengen kera! Ú fa er i hii ve Yesu a lu eren uivande mban cii kpa? Ka sha ci u ngu a dooshima sha ior man shi a soo er ve̱ na jighjigh ken a na. Nahan se fa je ser mimi je shighe u una hingir Tor la yô or môm shin tar nana kera lu uange mayange ga.