96-нҗы хекая

Иса сыркавлары сагалдяр

ИСА юрт айланып, сыркавлары сагалдяр. Онуң эден гудратлары барада хемме шәхерлер ве обалар эшидйәр. Шонуң үчин Исаның янына агсаклары, көрлери, лаллары, башга-да көп сыркавлары гетирйәрлер. Иса оларың хеммесини сагалдяр.

Яхяның Исаны сувда чокундыранындан бәри, үч йылдан говрак вагт гечди. Иса шәгиртлерине тизден Иерусалиме гитҗекдигини айдяр. Ол шол ерде өлдүрилмелидигини, соңра дирелмелидигини хем айдяр. Хәзир болса ол сыркавлары сагалтмагыны довам эдйәрди.

Бир гезек Иса сабат гүни адамлара өвредип дурды. Ехудылар сабат гүни дынч алярдылар. Суратдакы аялың ягдайы агырды. Ол 18 йылдан бәри били бүкүлип, асла дикелип биленокды. Иса элини дегрен бадына, ол дикелди. Ол аял сагалды!

Дини ёлбашчыларың муңа гахары гелди. Оларың бири: «Иш этмек үчин алты гүн бар. Беҗермәге сабат гүни дәл-де, башга гүн гелиң» дийип, адамлара гыгыряр.

Иса муңа җогап берип: «Сиз эрбет адамлар. Сиз сабат гүни эшегиңизи чөзүп, сувармага әкидйәңиз. 18 йыллап кеселлән шу пахыр аялы нәме үчин сабат гүни сагалтмалы дәл?» дийди. Исаның сөзлери эрбет адамлары утандыряр.

Соңра Иса шәгиртлери билен Иерусалиме гидйәр. Олар Эриха шәхеринден чыкан бадына, ёлуң гырасында отуран ики саны көр гедай Исаның гечип баряныны эшидйәр. Олар гыгырып: «Иса, бизе көмек эт!» дийип ялбаряр.

Иса олары чагырып: «Сиз үчин нәме эдейин?» дийди. Олар-да: «Я Реб, гөзүмиз ачылсын» дийдилер. Шонда Иса оларың гөзлерине элини дегирди велин, деррев гөзлери ачылды! Исаның нәме үчин шейле көп гудрат гөркезйәнини билйәңми? Себәби ол адамлары говы гөрйәр. Оларың иман этмегини ислейәр. Шонуң үчин Иса хөкүм сүренде, ер йүзүнде хич кимиң кеселлемеҗегине ынанып билерис.

Матта 15:30, 31; Лука 13:10—17; Матта 20:29—34.