Makani 96: Jesu Waponya Baciswa
JESU naya ceenda mumasena, uya ciponya baciswa. Makani aaya aamaleele aba ngamakani bantu ngobabandika muminzi yoonse. Aboobo bantu bamuletela balema, batalangi, basinke matwi abamwi baciswa. Alimwi Jesu wabaponya boonse.
Lino kwainda myaka yotatwe kuzwa ciindi Johane naakabbapatizya Jesu. Eelyo Jesu waambila baapositolo bakwe kuti ino-ino ulaunka ku Jelusalemu, kwalo nkwaya kujailwa akubusyigwa. Katanaunka, Jesu uluujisi kuponya baciswa.
Buzuba bumwi Jesu wakali kuyiisya mu Sabata. Sabata mbuzuba bwakulyookezya bwaba Juda. Mukaintu ngobwenyi waawa wali kuciswa kapati. Kwamyaka iili 18 waloongomenyi, aboobo tanaali kukonzya koololoka kwiima. Jesu wabikka janza ali nguwe, eelyo watalika kwiimikila kabotu. Waponesyegwa!
Eeci cabakalazya basololi bazikombelo. Umwi woongolola kubantu wati: ‘Kuli mazuba aali cisambomwe ngotweelede kubeleka. Aayo ngamazuba aakuboola kuponya bantu ikutali mu Sabata!’
Pele Jesu waingula wati: ‘Nywebo nobantu babi. Kufwumbwa nomuba ndinywe umwi ulakonzya kwaangulula mbongolo yakwe akwiinywisya meenda mubuzuba bwa Sabata. Hena mukaintu ooyu mucete iwali kuciswa kwamyaka iili 18 takonzyi kuponesyegwa mubuzuba bwa Sabata?’ Kwiingula kwa Jesu kwabagunisya aaba bantu babi.
Kumane Jesu abaapositolo bakwe beenda kuya ku Jelusalemu. Kabacili buyo anze aamunzi wa Jeliko, bantu bobilo batalangi balombelela bamvwa kuti Jesu ulainda. Aboobo boongolola bati: ‘Jesu tugwasye!’
Jesu wabaita basankwa batalangi, akubabuzya kuti: ‘Ncinzi ncomuyanda kuti ndimucitile?’ Bati: ‘Mwami, tuyanda kuti meso eesu atalike kulanga.’ Jesu waajata meso aabo, mpamunya batalika kulanga. Hena ulicizyi Jesu ncacitila maleele aaya woonse mabotu? Nkaambo kakuti ulabayanda bantu alimwi uyanda kuti babe alusyomo muli nguwe. Tulakonzya kuba masimpe kuti aakulela kali Mwami, taku muntu anyika uuya kuciswa.
Matayo 15:30, 31; Luka 13:10-17; Matayo 20:29-34.
Mibuzyo
- Ncinzi Jesu ncaakali kucita naakali kuya ceenda mumasena oonse?
- Ncinzi Jesu ncaakaambila baapositolo bakwe kwiinde myaka yotatwe yakubbapatizyigwa?
- Mbabaani bantu bali acifwanikiso, alimwi ncinzi Jesu ncaacita kumukaintu?
- Nkaambo nzi kwiingula kwa Jesu kukukazya kwabasololi bazikombelo ncokwabagunisya?
- Ncinzi Jesu ncaakacita kubantu bobilo batalangi kali abaapositolo bakwe basike munsi aamunzi wa Jeliko?
- Nkaambo nzi Jesu wakacita maleele?
Mibuzyo aimwi
- Bala Matayo 15:30, 31.
Mbubotu nzi butaliboteli bwanguzu zya Jehova butondezyedwe kwiinda muli Jesu, alimwi mbuti mbobweelede kukujatikizya kumvwa kwesu kuli ceeco Jehova ncaakasyomezya munyika mpya? (Int. 37:29; Is. 33:24)
- Bala Luka 13:10-17.
Mbuti kaambo kakuti Jesu wakacita maleele aakwe aamwi aayandika kapati mubuzuba bwa Sabata mbokatondezya kulemununwa nkwaya kuleta kubantu mu Bweendelezi bwakwe bwa Myaka iili Cuulu? (Lk. 13:10-13; Int. 46:9; Mt. 12:8; Kol. 2:16, 17; Ciy. 21:1-4)
- Bala Matayo 20:29-34.
Mbuti cibalo eeci mbocitondezya kuti Jesu tanaakali bbaatidwe cakutakonzya kugwasya bantu, alimwi ncinzi ncotukonzya kwiiya kumakani aaya? (Dt. 15:7; Jak. 2:15, 16; 1 Joh. 3:17)
Andiza Inga Mwaakkomanina Ayaaya
JESU—NENZILA, NGOKASIMPE, MBOBUUMI
Ino Maleele Acitwa Munguzu Zyani?
Banabokwabo Jesu bayeeya kuti Jesu wasondoka.
