PENEAPO Yesu wakendanga mu caru, wakacizganga ŵalwari. Mbiri ya minthondwe iyi yikupulikikwa mu vikaya na mu matawuni yose ya pafupi. Ntheura ŵanthu ŵakizanga na ŵakupendera, ŵambura kuwona, ŵambura kupulika na ŵanyake ŵanandi awo ŵakaŵa ŵalwari. Ndipo Yesu wakaŵacizga wose.

Vilimika pafupifupi vitatu vikajumphapo kufumira apo Yohane wakabapatizira Yesu. Yesu wakaphalira ŵapositole ŵake kuti mu nyengo yicoko waka walutenge ku Yerusalemu uko wakeneranga kukakomeka ndipo pamanyuma pake kuwuka ku ŵakufwa. Yesu wakalutilira kucizga ŵalwari.

Zuŵa linyake Yesu wakasambizganga pa Sabata. Sabata likaŵa zuŵa la kupumura la Ŵayuda. Mwanakazi uyo ukumuwona apa waŵa mulwari kwa nyengo yitali. Wakaŵa wakukokonyara kwa vilimika 18, ndipo wakatondekanga kwinuka. Ntheura Yesu wakaŵika mawoko ghake pa iyo, ndipo wakamba kwinuka. Wakacizgika!

Ici cikakwiyiska ŵalongozgi ŵacisopo. ‘Pali mazuŵa ghankhondi na limoza gheneagho tikwenera kugwira nchito,’ yumoza wa iwo wakayowoya ntheura kuphalira wumba. ‘Agha ndigho mazuŵa ghakuti mwize kuti mucizgike, pa Sabata cara!’

Kweni Yesu wakazgora kuti: ‘Mwa ŵanthu ŵaheni imwe, ninjani wa imwe wangaleka kusutura mbunda yake kuti yikamwe maji pa Sabata? Sono mwanakazi mukavu uyu, uyo waŵa mulwari kwa vilimika 18, waleke kucizgika pa Sabata?’ Zgoro la Yesu likapangiska ŵanalume ŵaheni aŵa kucita soni.

Pamanyuma pake Yesu na ŵapositole ŵakalutirizga ulendo wawo kulazga ku Yerusalemu. Ŵati ŵafika waka kuwaro kwa tawuni ya Yeriko, ŵaciburumutira ŵaŵiri ŵakapulika kuti Yesu wakajumphanga. Ntheura ŵakacemerezga kuti: ‘Yesu, tovwirani!’

Yesu wakacema ŵanalume ŵaciburumutira aŵa na kuŵafumba kuti: ‘Kasi mukukhumba kuti nimucitirani vici?’ Iwo ŵakati: ‘Fumu, kuti maso ghithu ghajurike.’ Yesu wakakora maso ghawo, ndipo penepapo ŵakamba kuwona! Kasi ukumanya cifukwa ico Yesu wakacitira minthondwe yose iyi? Cifukwa wakatemwa ŵanthu ndipo wakakhumbanga kuti ŵaŵe na cipulikano mwa iyo. Ntheura tingaŵa ŵakusimikizga kuti para wayamba kuwusa nga ni Fumu, palije uyo wazamulwaraso.