Esapulo 96: Yesu wa Sakula Olombei
OSIMBU Yesu a kala oku linga ungende valupale, eye wa sakula olombei. Ovikomo viaco via yevala kolonepa viosi. Kuenje omanu va fetika oku nena kokuaye ovilema, olomeke, kuenda olombei vikuavo. Yesu wa va sakula vosi yavo.
Papitile ale anyamo atatu tunde eci Yoano a papatisa Yesu. Yesu wa sapuila olondonge viaye okuti noke o ka enda ko Yerusalãi, kuna a laikele oku pondiwa loku pinduiwa. Votembo yaco, Yesu wamamako oku sakula olombei.
Eteke limue Yesu wa kala oku longisa Kesambata. Esambata eteke limue liepuyuko ku va Yudea. Ukãi o lete ndeti palo o vela calua. Eye wa kala ocilema ci soka ekũi lecelãla kanyamo. Kuenje eci Yesu o kuata wa kaya, noke wa votoka.
Eci ca temisa calua asongui vetavo. Ovo va kaluka hati: ‘Kuli oloneke epandu vi sesamẽla oku linga upange. Enjui koloneke viaco oku sakuiwa Kesambata hacoko.’
Yesu wa kumbulula hati: ‘Ene wa kuambambe. Kuli he umue pokati kene okuti keteke Liesambata ka kutulula ongombe yaye oku yi nyuisa? Ukãi u, wa kala loku vela ekũi lecelãla kanyamo, ka ca sungulukile oku kayisa keteke Liesambata?’ Alume va kutisiwa osõi letambululo lia Yesu.
Noke Yesu kumue lolondonge viaye va enda toke ko Yerusalãi. Eci va pitĩla vo lupale luo Yeriko, alume vavali okuti olomeke, va yeva okuti Yesu wa kala oku pita. Ovo va kaluka hati: ‘A Yesu, tu linge ohenda!’
Yesu wa vilikiya olomeke vivali, yu wa va pulisa hati: ‘Nye vu yongola okuti ndu ci lingili?’ Ovo va kumbulula hati: ‘A Ñala, ovaso etu a patuluke.’ Yesu wa lamba vovaso avo kuenje haico va letuluka. Ove hẽ wa kũlĩha esunga lieci Yesu a lingila ovikomo evi? Momo eye wa solele calua omanu kuenda wa yonguile okuti vo kolela. Ovikomo viaco vi tu ĩha ekolelo liokuti eci Yesu aka viala Ndosoma, lomue oka vela vali.
Mateo 15:30, 31; Luka 13:10-17; Mateo 20:29-34.
Apulilo
- Nye Yesu a lingaile poku enda kimbo limbo?
- Eci Yesu a tẽlisa ci soka anyamo atatu tunde koku papatisiwa kuaye nye a sapuila olondonge viaye?
- Omanu ava vociluvialuvia velie? Kuenda nye Yesu a lingila ukãi u?
- Nye Yesu a tambulula kasongui vetavo okuti ca va kutisa osõi?
- Eci Yesu a kala ocipepi lo Yeriko kumue lovapostolo vaye nye a lingila olomeke vivali?
- Momo lie Yesu a lingila ovikomo?
Apulilo akuavo
- Tanga Mateo 15:30, 31.
Unene upi Yehova a lekisila vonduko ya Yesu? Kuenda eci ci tu ĩha ekolelo lie liatiamẽla kohuminyo ya Yehova yoluali luokaliye? (Osa. 37:29; Isa. 33:24)
- Tanga Luka 13:10-17.
Ovikomo vimue Yesu a linga vo Casapalo via lekisa ndati ocisola aka kuatela omanu Vuviali waye Wohũlũkãi Yanyamo? (Luka 13:10-13; Osa. 46:9; Mat. 12:8; Va Kol. 2:16, 17; Esit. 21:1-4)
- Tanga Mateo 20:29-34.
Ulandu owu u lekisa ndati okuti upange walua wa Yesu ka wo tatekele oku kuatisa omanu? Kuenda nye tu lilongisilako? (Esin. 15:7; Tia. 2:15, 16; 1 Yoa. 3:17)
Ove o ka ci Sola
YESU—ONJILA, OCILI HAEYE OMUENYO
Yesu o Linga Ovikomo Lunene Welie?
Vamanji a Yesu va sima okuti eye wa linga eyui.
