SAMTANG nagbibyahe hi Jesus ha bug-os nga Israel, nagtatambal hiya hin magsakit. An mga sumat mahitungod hini nga mga milagro nakaabot ha kahirani nga mga baryo ngan bungto. Salit gindara ha iya han mga tawo an mga piang, buta, bungol ngan damu pa nga magsakit. Ngan gintambal ni Jesus hira ngatanan.

Tulo na ka tuig an naglabay tikang nga ginbawtismohan ni Juan hi Jesus. Ngan ginsumatan ni Jesus an iya mga apostol nga diri mag-iiha makadto hiya ha Jerusalem, ngan papatayon hiya didto, kondi babanhawon. Samtang hito nga panahon, padayon nga nagtatambal hiya hin magsakit.

Usa ka adlaw, nagtutdo hi Jesus ha panahon han Sabbath, an adlaw nga iparahuway han mga Judio. An babaye nga nakikita mo dinhi ha retrato, may-ada grabe nga sakit. Mga 18 ka tuig na nga diri hiya nakakatindog hin tadong. Salit ginkaptan hiya ni Jesus, ngan nakatindog hiya hin tadong. Maopay na hiya!

Tungod hito nasina an mga lider han relihiyon. ‘Unom ka adlaw nga puydi kita magtrabaho,’ nagsinggit ha mga tawo an usa ha ira. ‘Ito an mga adlaw han pagtambal, diri ha Sabbath!’

Kondi hi Jesus binaton: ‘Magraot kamo nga mga tawo. Ginbubuhian niyo an iyo asno ngan ginpapainom ito ha Sabbath. Salit, diri ba sadang tambalon ha Sabbath ini nga babaye nga 18 ka tuig na nga masakit?’ Naawod inin magraot nga tawo tungod ha ginsiring ni Jesus.

Katapos, hi Jesus ngan an iya mga apostol nagpakadto ha Jerusalem. Han dida pa la hira ha gawas han Jeriko, hinbatian han duha nga buta nga makililimos nga naagi hi Jesus. Salit nagsinggit hira: ‘Jesus, buligi kami!’

Gintawag ni Jesus an mga buta, ngan nagpakiana: ‘Ano an karuyag niyo nga buhaton ko ha iyo?’ Hira binaton: ‘Ginoo, abrihi an amon mga mata.’ Ginkamkam ni Jesus an ira mga mata ngan nakakita dayon hira! Maaram ka ba kon kay ano nga ginbuhat ni Jesus ini nga urusahon nga mga milagro? Tungod kay hinigugma niya an mga tawo ngan karuyag niya nga tumoo hira ha iya. Salit makakasiguro kita nga kon magmando na hiya sugad nga Hadi, waray na bisan usa dinhi ha tuna an magkakasakit utro.