HISITOLIA 96
ʼE Fakamālōlō e Sesu Te ʼu Mahaki
ʼI TE feʼaluʼaki ʼa Sesu ʼi te fenua, neʼe ina fakamālōlō te ʼu mahaki. Ko te logo ʼo te ʼu milakulo ʼaia neʼe fakamatala ʼi te ʼu kolo lalahi pea mo te ʼu kolo liliki. Pea neʼe ʼaumai kia te ia te ʼu hahaʼi māʼimoa pea mo te ʼu kivi pea mo te ʼu tuli, pea mo te tahi ʼu mahaki. Pea neʼe fakamālōlō e Sesu ia nātou fuli.
Kua ʼosi taʼu e tolu ki te temi ʼaē neʼe papitemaʼi ai ia Sesu e Soane. Pea neʼe ʼui e Sesu ki tana ʼu ʼapositolo, ʼe mole kei tuai, pea ʼe hake anai ia ia ki Selusalemi, pea ʼe matehi ai anai ia ia, pea ʼe fakatuʼuake anai mai te kau mate. Lolotoga te temi ʼaia, neʼe fakamālōlō e Sesu te kau mahaki.
ʼI te tahi ʼaho neʼe faiakonaki ia Sesu ʼi te ʼaho ʼo te Sapato. Ko te Sapato ʼe ko te ʼaho mālōlō ia ʼo te kau Sutea. Ko te fafine ʼaē ʼe koutou sio ki ai ʼi henī neʼe mahaki kovi. Lolotoga taʼu e 18 neʼe tuʼa piko, pea neʼe mole feala hana tuʼutonu. Pea neʼe hilifaki e Sesu tona ʼu nima ki ai, pea kamata tuʼutonu ai. Pea lelei ai tona mahaki!
Neʼe tupu ai te ʼita ʼo te ʼu tagata takitaki lotu. Neʼe ʼui e te tahi ia nātou ki te hahaʼi: ‘Ko ʼaho e ono ʼaē ʼe tonu ke tou gāue ai. ʼI te ʼu ʼaho ʼaia ʼe feala hakotou ʼōmai ke fakamālōlō ai koutou, kae mole koutou ʼōmai ʼi te ʼaho ʼo te Sapato!’
Kae neʼe tali age e Sesu: ‘ ʼU tagata agakovi. ʼE koutou ʼave takoutou asino ʼo faka ʼinu ʼi te ʼaho ʼo te Sapato. Koia ʼe mole feala koa la ki te fafine fakaʼofaʼofa ʼaenī, ʼaē ʼe mahaki talu mai ia taʼu e 18, ke fakamālōlō ʼi te ʼaho ʼo te Sapato?’ Neʼe ufiufi ai te ʼu tagata agakovi ʼaia ʼi te tali ʼaē neʼe fai age e Sesu.
Ki muli age neʼe fagona ia Sesu pea mo tana ʼu ʼapositolo ʼo ʼolo ki Selusalemi. ʼI tanatou mavae atu ʼi te kolo ko Seliko, neʼe ʼiloʼi e te ʼu tagata kivi e toko lua ko Sesu ʼaē ʼe fakalaka. Pea neʼe nā kalaga fēnei: ‘Sesu, tokoni mai kia māua!’
Neʼe pāuiʼi e Sesu te ʼu tagata kivi ʼaia, pea ina fehuʼi age kia nāua: ‘Koteā te meʼa ʼaē ʼe koulua loto ke ʼau fai maʼa koulua?’ Neʼe nā ʼui fēnei: ‘ ʼAliki, fai ke ava ʼoma mata.’ Neʼe fāfā ia Sesu ki tonā ʼu mata, pea neʼe nā sio ai! ʼE koutou ʼiloʼi koa pe koʼe neʼe fai e Sesu te ʼu milakulo fakaofoofo ʼaia? Koteʼuhi neʼe ʼofa ia ki te hahaʼi, pea neʼe loto ia ke nātou tui kia te ia. Pea ʼe feala ke tou tui papau, ko te temi ʼaē ka Hau ai anai, ʼe mole toe mahaki anai he tahi ʼi te kele.