Tantara 96

Jesosy Nampahivan̈a Olo Marary

JESOSY koa fa nitety tanàna, nampahivan̈a olo marary. Tamy zen̈y nalaza fahagagan̈a nataony, na tan-tanàna, na tambanivolo. Olo amy zay navy, nitaondra olo nisy antsa, gila, maren̈iny, ndreky olo marary maro koa. Jesosy nampahivan̈a irô jiaby.

Efa nandilatra telo taon̈o zay Jaona nan̈ano batisa Jesosy in̈y. Jesosy nivolan̈a tamin’apostolinany aby io fa izy efa tsy ela handeha Jerosalema, ke an̈y izy vonen̈a, baka iô ho velon̈o ndreky. Talohan’izen̈y fo, Jesosy nampahivan̈a olo marary.

Tandraraiky, Sabata andra tamy zen̈y, Jesosy nampianatra. Sabata io andra fangalan̈a kajo tamy faha Jiosy aby io. Man̈angy hitanao amy sary io narary mare. Izy tsy nahafaka nitsangana mahitsy tan̈atin’ny 18 taon̈o. Niaraka Jesosy nitana izy, izy nahafaka nitsangana. Izy janga!

Nampaneloko mpitaondra fivavahan̈a aby io raha zen̈y. Araiky tamin-drô nasiaka olo aby nivory tiô, nivolan̈a kara’ty: ‘An̈atin’ny tsiaota andra fiasan̈a fitahan̈a olo fa tsy amin’andra sabata!’

Jesosy namaly volan̈an-drô: ‘Haratsiam-pan̈ahinarô fo zen̈y. Ndray anarô mba mamaha borikinarô ndreky mampigiaka ramevanarô amin’andra sabata. Ke nan̈ino man̈angy mampalahelo io, efa narary tan̈atin’ny 18 taon̈o, tsy mahazo tahan̈a amin’andra sabata?’ Olo ratsy fan̈ahy aby io vôty naharen̈y volan̈a Jesosy zen̈y.

Tsy ela tafaran’izin̈y, Jesosy ndreky apostolinany aby io nandeha ta Jerosalema. Irô koa fa tafiboaka tanànan’i Jerikô, nisy olo gila aroe, mpangataka asan-drô, naharen̈y Jesosy nandalo. Irô nikaikaiky nare: ‘Jesosy, vonjia zahay!’

Jesosy nikaiky olo gila aby in̈y, baka iô nan̈ontany: ‘Ino raha tianarô ataoko aminarô?’ Irô nivolan̈a: ‘Ataova mahita masonay, tômpoko anao ô.’ Jesosy nitosy mason-drô, ke niaraka tamy zen̈y, irô nahita! Hainao nan̈ino Jesosy nan̈ano fahagagan̈a jiaby zen̈y? Fôtony izy tia olo sady tiany koa irô hino izy. Aviô koa, atsika matoky tsarabe fa lera izy Ampanjaka an̈y, tsisy olo marary eky ambony tany.

Matio 15:30, 31; Lioka 13:10-17; Matio 20:29-34.