YESU pakwenda m’cilambo cosopeco, akwaposya ŵakulwala. Ngani jakwamba yakusimonjesya yaŵatendagayi, jikupikanika m’misi ni m’misinda jakusungulila. M’yoyo ŵandu akwisa nawo kwa jwalakwe ŵalemale, ŵangalola, soni ŵangapikana, ni ŵakulwala ŵajinji. Yesu akwaposya ŵandu wosopewo.

Papite yaka yakupunda yitatu Yesu ali abatiswe ni Yohane. Sambano Yesu akwasalila ŵandumetume ŵakwe kuti pacangakaŵa cajawule ku Yelusalemu, kwacakawulajikwe, soni kaneko cacijimuka ku ŵawe. Nambo pandaŵi ajino, Yesu akwendelecela kwaposya ŵakulwala.

Lisiku line Yesu akwiganya pa Sabato. Sabato lili lisiku lyakusapumula Ayuda kamula masengo. Jwamkongwe jwakum’wona apanoju aŵele ali mkulwala mnope. Kwa yaka 18 aŵele ali jwam’gongomale, soni nganakombolaga kwinamukuka cenene. Sambano Yesu akuŵika makono gakwe pa jwalakwe, ni akutanda kwinamukuka cenene. Kaneko akupola!

Yeleyi yikwatumbilikasya acimlongola ŵa dini. Jwine mwa jemanjaji akugumila ku likuga lya ŵandulyo kuti: ‘Gapali masiku msano ni limo gatukusosekwa kamula masengo. Gelego gali masiku gakwisa mundu kukumposya ulwele, ngaŵaga pa lisiku lya Sabato!’

Nambo Yesu akwanga kuti: ‘Jemanja ŵandu ŵakusakala kwabasi. Jwalijose jwa jemanja mpaka amgopole bulu jwakwe ni kwawula najo kukumwa mesi pa lisiku lya Sabato. Nambi kuli wuli jwamkongweju, jwaŵele ali mkulwala kwa yaka 18, ana ngakusosekwa kumposya pa lisiku lya Sabato?’ Ŵandu ŵakusakalaŵa akutenda sooni ni yajanjile Yesu.

Kaneko Yesu ni ŵandumetume ŵakwe akwawula ca ku Yelusalemu. Pagambile kwika kusa kwa msinda wa Yeliko, acalume ŵangalola ŵaŵili ŵakusatamilaga kuŵenda akupikana kuti Yesu akupita. Sambano jemanjaji akugumila acitiji: ‘Yesu atukamucisye m’weji!’

Yesu akwaŵilasya acalume ŵangalola ŵala, ni kwawusya kuti: ‘Ana jemanja akusaka kuti natendele cici?’ Ni jemanjajo akwanga kuti: ‘Ambuje tukusaka kuti meso getu gawuguce.’ Yesu akukamula meso gawo, ni pandaŵi jijojo akukombola kulola! Ana akumanyilila ligongo lyakwe Yesu akutenda yindu yakusimonjesyayi? Lili ligongo lyakuti akusiŵanonyela ŵandu, soni akusaka kuti ŵanduwo amkulupilileje. Soni mpaka tukulupilile kuti pacacilamulilaga mpela Mwenye, ngasipapagwasoni jwakulwala pacilamboci.