BENƐ Yesu tsa hɛyuyuili ní bali enyɔ ɔmɛ se bɔɔ ɔ, e ya su kɔpe ko ngɛ Yerusalem kasa nya. Nɛ e de e kaseli ɔmɛ a kpɛti nihi enyɔ ke: ‘Nyɛɛ sɛ kɔpe ɔ mi, nɛ nyɛ maa na teji wayoo ko nɛ a muɔ lɛ si. Nyɛɛ pɛne lɛ nɛ nyɛɛ ngɔ lɛ kɛ ba ha mi.’

Benɛ a ngɔ teji ɔ kɛ ba ha lɛ ɔ, e hi nɔ kɛ ho Yerusalem nɛ́ e kɛ lejɛ ɔ kɛ we tsɔ ɔ ya. Benɛ e piɛ bɔɔ nɛ e maa sɛ ma a mi ɔ, nimli babauu je kpo kɛ ba kpee lɛ. A kpɛti nihi fuu je a tadehi ngɔ ha blɔ ɔ nɔ. Ni komɛ hu po tã bahi ngɔ pue blɔ ɔ nɔ. Nɛ a kpa ngmlaa kɛ de ke: ‘Mawu nɛ jɔɔ matsɛ ɔ nɛ ma ngɛ Yehowa biɛ mi ɔ!’

Blema lokoo ɔ, Israel matsɛmɛ ehehi hii teji wayoo nɔ kɛ baa Yerusalem nɛ a kɛ a he ba tsɔɔ mabi ɔmɛ. Enɛ ɔ nɛ Yesu ngɛ pee ɔ nɛ. Nɛ ni ɔmɛ ngɛ tsɔɔe kaa a suɔ nɛ Yesu nɛ pee a matsɛ. Se pi ni ɔmɛ tsuo nɛ suɔ lɛ. Wa maa na enɛ ɔ ngɛ nɔ́ nɛ ba benɛ e ya sɔlemi we ɔ mi.

Yesu tsa hɛyuyuili kɛ obubuafohi ngɛ sɔlemi we ɔ. Nɛ benɛ jokuɛwi nɛ ngɛ lejɛ ɔ na a, a kpa ngmlaa kɛ je Yesu yi. Se enɛ ɔ wo osɔfo ɔmɛ a mi mi la nɛ a bi Yesu ke: ‘O nu nɔ́ nɛ jokuɛwi ɔmɛ ngɛ dee ɔ lo?’

Yesu ha heto ke: ‘Ee, i nu. Anɛ nyɛ kane we nɔ́ nɛ a ngma ngɛ Baiblo ɔ mi ke: “Mawu maa gu jokuɛwi a nɔ kɛ ma je e yi” ɔ lo?’ Lɔɔ he ɔ, jokuɛwi ɔmɛ ya nɔ nɛ a je Mawu matsɛ ɔ yi.

Tse wa suɔ nɛ waa pee kaa jamɛ a jokuɛwi ɔmɛ, loo pi ja? Ni komɛ maa bɔ mɔde kaa a maa tsi wa nya konɛ wa ko sɛɛ Mawu matsɛ yemi ɔ he ní hu. Se kɛ̃ ɔ, wa maa ya nɔ nɛ wa maa sɛɛ nyakpɛ níhi nɛ Yesu maa pee hwɔɔ se ngɔ ha nimli ɔ kɛ ha ni kpahi.

Benɛ Yesu ngɛ zugba a nɔ ɔ, be sui ha lɛ lolo kaa e maa ye matsɛ. Mɛni be jamɛ a be ɔ maa su? Yesu kaseli ɔmɛ suɔ kaa a le. Wa maa kase enɛ ɔ he ní ngɛ ní kasemi nɛ nyɛɛ se ɔ mi.