PA NUMA fye ya kuposha impofu shibili ishalelombelesha indalama, Yesu aile mu mushi uunono uwali mupepi na Yerusalemu. Aebele abasambi bakwe babili ati: ‘Kabiyeni muli ulya mushi kabili mwalasanga impunda. Muikakule no kuileta kuli ine.’

Ilyo bamuletele impunda, Yesu aikele pali yena. Lyena aendeele pa mpunda ukuya ku Yerusalemu. Umusumba wa Yerusalemu tawali ukutali sana. Ilyo afikile mupepi no musumba, abantu abengi balifumine mu kumumona. Abengi bafuulile ifya kufwala fyabo no kufyanshika mu musebo. Bambi bakontwele imisambo ku miti. Baibikile mu musebo, no kutendeka ukubilikisha ati: ‘Lesa apaale imfumu iileishila mwi shina lya kwa Yehova!’

Kale sana mu Israele, imfumu ishipya shale-endela pa mpunda ilyo shileya ku Yerusalemu pa kuilanga ku bantu. Ifi fine e fyo na Yesu acitile. Kabili balya abantu balilangile ukuti balefwaya Yesu ukuba imfumu yabo. Lelo te bantu bonse balefwaya ukuti abe imfumu. Ifyacitike ilyo Yesu aile mwi tempele e filanga ukuti kwali abashalemufwaya.

Pe tempele, Yesu aliposeshe impofu na balemana. Ilyo abana abanono bamwene ifyo Yesu acitile, balesansula amashiwi pa kulumbanya Yesu. Lelo bashimapepo balifulilwe sana, kabili baebele Yesu abati: ‘Bushe naumfwa ifyo abana balelanda?’

Yesu ayaswike ati: ‘Ee ning’umfwa. Bushe tamwabelenga filya Baibolo ilanda ukuti: “Lesa akalenga abana abanono ukumulumbanya?”’ E ico abana abanono batwalilile fye ukulumbanya imfumu iyo Lesa asala.

Tufwile ukuba nga balya abana, te fyo? Abantu bamo kuti baletukaanya ukulanda pa bufumu bwa kwa Lesa. Lelo tukatwalilila ukwebako abantu pa fisuma ifyo Yesu akacitila abantu.

Yesu tatendeke ukuteka ilyo ali pano calo. Ni lilali ali no kutendeka ukuteka? Abasambi ba kwa Yesu balefwaya ukwishiba. Ici e co twalalandapo mwi sambililo lyakonkapo.