SI Jesus nahiabot sa usa ka gamayng balangay duol sa Jerusalem. Iyang gisultihan ang duruha sa iyahang mga tinun-an: ‘Sumulod kamo sa balangay ug inyong makaplagan ang usa ka nating asno. Badbara kini ug dad-a nganhi kanako.’

Unya si Jesus mikabayo sa asno, ug mipaingon sa Jerusalem nga dili na halayo. Ang usa ka dakong panon sa katawhan misugat kaniya. Ang kadaghanan kanila nanagpamuklad sa ilang mga sapot sa dalan. Ang uban nanagpamutol sa mga sanga sa kahoyng palma ug gikatag usab kini diha sa dalan. Naninggit sila: ‘Ang Diyos nagpanalangin sa hari nga mianhi sa ngalan ni Jehova.’

Dugay na kanhi sa Israel ang bag-ong mga hari misakay sa usa ka nating asno paingon sa Jerusalem aron sa pagpakita sa ilang kaugalingon sa katawhan. Kini mao ang gibuhat ni Jesus. Ug kining mga tawhana nagpakita nga sila gusto kang Jesus nga mahimong ilang hari. Apan dili ang tanang katawhan nakagusto kaniya. Makita ta kini pinaagi sa mga nahitabo sa dihang miadto si Jesus sa templo.

Sa templo, si Jesus nag-ayo sa mga tawo nga buta ug bakol. Sa nakita kini sa gagmayng kabataan, naninggit sila sa mga pagdayeg kang Jesus. Apan ang mga saserdote nasuko ug miingon ngadto kang Jesus: ‘Nabati ba nimo ang gisulti sa kabataan?’ Si Jesus mitubag: ‘Wala ba gayod kamo makabasa sa Bibliya diin kini nagkanayon: “Gikan sa mga baba sa gagmayng kabataan ang Diyos magpagula sa pagdayeg?”’ Busa ang kabataan nagpadayon sa pagdayeg kang Jesus.

Gusto kitang mahisama nianang kabataan, dili ba? Bisan unsay isulti sa ubang mga tawo, kita mopadayon sa pagsulti sa uban bahin sa kahibulongang mga butang nga buhaton ni Jesus alang sa katawhan.

Kanus-a man ang panahon moabot alang kang Jesus nga mosugod sa pagmando ingon nga hari? Makabasa kita bahin niini sa sunod.