RAWLHAL mitcaw pahnih a damter hna hnu tlawmpal ah, Jesuh cu Jerusalem pawng khua hmete pakhat ah a ra. A zultu pahnih kha: ‘Khua chung ah va lut u law laa fate pakhat nan hmuh lai. A hri kha va phoih u law ka sin ah ratpi u,’ tiah a ti hna.

Laa fate cu a sin ah an ratpi tik ah, Jesuh nih laa fate cu aa cit. Cun lam naite i a um mi Jerusalem lei ah a kal. Khualipi pawng a phanh tik ah, mibu nganpi nih amah cu an rak don. Mi tampi nih an puan kha an phoih i lam cung ah an phah hna. Midang nih tum kung nge kha an sam hna i lam cung ahcun an phah ve i: ‘Jehovah min in a ra mi siangpahrang cu Pathian nih thluachuah pe ko seh!’ tiah an au.

Hlan lio i Israel siangpahrang thar hna cu Jerusalem khua chung ah mi hna sin i hmuhsak awk ah laa fate kha an i cit i an kal tawn. Mah cucu Jesuh nih a tuah ve mi a si. Cun hi mi hna zong nih hin Jesuh cu an siangpahrang caah an duh ti kha an langhter. Asinain, mikip nih Jesuh cu an rak duh dih lo. Cucu Jesuh nih biakinn i a kal lio ah a tlung mi thilthawng in kan hngalh khawh.

Biakinn ah Jesuh nih mitcaw mi le kebei mi hna kha a damter hna. Ngakchia nih mah cu an hmuh tik ah, Jesuh thangṭhatnak in an au. Sihmanhsehlaw mah nihcun tlangbawi pawl kha an thin a hunter hna i: ‘Ngakchia nih an chim mi bia cu na thei maw?’ tiah Jesuh kha an hal.

‘Ka theih ko. Baibal chung i: “Ngakchiatete hna ka in thangṭhatnak kha Pathian nih a chuahter,” a ti mi kha nan rel bal lo maw?’ tiah a leh hna. Cubang in ngakchiatete nih Pathian thim mi siangpahrang cu an thangṭhat.

Cu ngakchia hna bantuk cu kannih zong si kan duh ve. Kan duh lo mei? Pathian pennak kong chim lo awk ah mi cheukhat nih an kan thlauh khawh men. Sihmanhsehlaw mi hna caah Jesuh nih a tuah lai mi khuaruahhar thil hna kong kha kan chim lengmang ko lai.

Jesuh cu vawlei cung a rak um lio ah siangpahrang in a uknak ding caan a tling rih lo. Cu caan cu zeitikahdah a tlin te lai? Jesuh zultu hna zong nih hngalh an duh ve. Mah kong cu kan rel ṭhan te lai.