OKENỌ Jesu osiwi eyae ituaro ivẹ nọ e jẹ yare eware no, ukri hi o te kpobọ iwhre esese nọ ọkẹlẹ Jerusalem. Ọ tẹ ta kẹ ilele ivẹ riẹ nnọ: ‘Wha nya kpobọ iwhre na wha te ruẹ upelẹ eketekete. Wha feriẹ re wha rehiẹ se omẹ.’

Nọ a rehọ eketekete na sei no, Jesu ọ tẹ keria ehru riẹ. Kẹsena ọ tẹ dhẹ kpobọ Jerusalem nọ o thabọ họ. Okenọ ọ kẹle okpẹwho na no, ogbotu ahwo buobu a tẹ ruọ otafe re a nyai zerie. Ibuobu rae e tẹ ba iwu rai no a te fiai họ edhere na. Amọfa a tẹ nawo eyae iriẹ ze. A te fiai họ edhere na re, a te bo nọ: ‘Ọghẹnẹ ọ ghale ovie nọ ọ rehọ odẹ Jihova ze!’

Ukri no evaọ Izrẹl nọ ivie ekpokpọ erẹ dhẹ upelẹ eketekete kpobọ Jerusalem re a dhesẹ oma rae kẹ ahwo. Onana họ onọ Jesu o re ruo na. Yọ ahwo ọnana a bi dhesẹ nọ ae a gwọlọ nọ Jesu ọ jọ ovie rai. Rekọ ahwo na kpobi a gwọle riẹ hẹ. Ma ruẹ onana fiki oware nọ ovia evaọ okenọ Jesu okpobọ tẹmple.

Jesu o siwi ahwo nọ atuaro gbe enọ eko evaọ tẹmple na. Okenọ emaha na a ruẹ onana, a tẹ koyẹ jiri Jesu. Rekọ onana u te ru eva dha izerẹ na, a tẹ ta kẹ Jesu nọ: ‘Who bi yo epanọ emaha na erẹ ta na?’

‘Ẹhẹ, me bi yo,’ ere Jesu o yo. ‘Kọ wha gbẹ te jọ evaọ Ebaibol na se oria nọ o jẹ ta nọ: “Ọghẹnẹ ọ te rehọ ujiro no unu emaha na ze?”’ Fikiere emaha na etẹ ruẹ abọ họ ovie Ọghẹnẹ ejiro.

Ma gwọlọ jọ wọhọ emaha eyena, ma gbẹ gwọlọ ere? Ahwo jọ a rẹ daoma re a whaha omai ẹme ọ ta kpahe uvie Ọghẹnẹ. Rekọ ẹtẹta ma rẹ gbẹ ta kẹ amọfa kpahe eware igbunu nọ Jesu o bi ti ru kẹ ahwo.

Okenọ Jesu ọ jọ otọakpọ yọ oke nọ o je muhọ esuo wọhọ ovie u ri te he. Oke ovẹ oke onana u re ti te? Ilele Jesu e gwọlọ riẹ. Oye ma rẹ te wariẹ se kpahe.