QINUSARTUT tappiitsut marluk ajorunnaarsereeramigit kinguninngua Jesus nunaqarfeerannguamut Jerusalemip eqqaaniittumut tikiuppoq. Ajoqersukkami ilaat marluk oqarfigai: ’Nunaqarfeeqqamut iseritsi tassani siutituuaraq naapissavarsi. Pituussaarsiuk uannullu aggiullugu.’

Siutituuaraq aanneqarmat Jesus qaavanut ingippoq. Taava Jerusalemimut ungasinngitsumiittumut qimusserpoq. Illoqarfik pallimmagu inuppassuit parsiarpaat. Amerlanersaasa annoraatik qallersaatit peerpaat aqqusinermullu ilillugit. Ilaallu palmit avalequtaannik killuipput. Tamakkuttaaq aqqusinermut siaruarterpaat torlulallutillu oqarput: ’Kunngi Jehovap aqqani tikiuttoq Guutip pilluaqquliuk!’ Itsarsuaq Israelimi kunnginngorlaat siutituuaqqamut qimusserlutik Jerusalemimut iseriartortarput inunnut sassarlutik. Jesus taamaaliorpoq. Inuillu taakku takutippaat Jesus imminnut kunngioqqugitsik. Inuilli tamakkeratik imminnut kunngioqquaat. Tamanna paasinarpoq Jesusip naalaffimmut isernerani pisumit.

Naalaffimmi Jesusip inuit tappiitsut iloqiaasullu ajorunnaarsippai. Meerannguit tamanna takuleramikku Jesus unnersiutigilerpaat. Palasilli tamanna kamaatigilerpaat, Jesusilu oqarfigaat: ’Meeqqat qanoq oqartut tusarpigit?’

’Aap, tusarpakka,’ Jesusip akivai. ’Biibilimi atuarsimannginnerpisiuk allassimammat: „Meerannguit qarninit Guutip nersuutissaq piareersarpaa“?’ Taava meeqqat Guutip kunngiutitaa unnersiutigiuarpaat.

Uagut meeqqat taakku assigiumavavut, ilaa? Inoqarsinnaavoq Guutip naalagaaffia pillugu oqalunnitsinni akornusiiniartunik. Uagulli nuanningaartunik inunnut Jesusip naammassiumaagaanik inuit allat oqaluttuuttuaannassavavut.

Nunamiikkallarami Jesusip kunngitut naalakkersuinissaa suli nalliussimanngilaq. Piffissaq tamanna qaqugu nalliutissava? Jesusip ajoqersugaasa tamanna paasiumavaat. Tulliani tamanna pillugu atuassaagut.