Chihande 97

Yesu Mweza mwaMwangana

KAPYAPYA kakandende kufuma hakuhindula vaze tupuputa vavali, Yesu hiwasha kukalimbo kahata kuYelusalema. Kaha mwamba tumbaji twenyi vavali ngwenyi: ‘Yenu kwimbo lize, kaha namuwanamo mwanachimbulu. Mukasununenu mumunehe kuno kuli ami.’

Omu Yesu vanamunehela chimbulu, hikunyinaho. Jino hikuya kuYelusalema, hali katunda kakehi kaha. Omu nahete kulimbo kana, liyongomena lyavatu nalilovoka nakumusesa. Vavavulu hikuzula mahinavo nakuwala mujila. Vakwavo hikupamuna mitango yamivale. Hikuyala nayikiko mujila, nakuvilika ngwavo: ‘Kalunga akisulenga mwanganou mweza mulijina lyaYehova!’

Kushikulu muIsalele vamyangana vavahya vapwilenga nakunyina havana vavimbulu nakwingila muYelusalema mangana valisolole kuvatu. Mukiko anakulinga Yesu. Ava vatu vanakusolola nawa nge vanakusaka Yesu apwenga mwangana wavo. Oloze kavamusakile kuvatu vosenako. Natuchimona havyuma navisoloka omu mwaya Yesu kutembele.

Kuze kutembele Yesu himwahindula tupuputa navitonji. Vanyike hakumonako, hinavamwalisa Yesu. Oloze vapilishitu vanapihilila, nakumwamba Yesu ngwavo: ‘Unevuko omu vali nakutambakanava vanyike nyi?’

Yesu ngwenyi: ‘Eyo, Ngunevuko. Uno kanda mutangengaho lyehi muMbimbiliya mazu awa ngwavo, Mutunwa twavanyike Kalunga nalovolamo kwalisa nyi?’ Ngocho vana chivatwalaho nakwalisa mwangana wakuli Kalunga.

Natusaka kupwa nge vaze vanyike, ngwetu? Vatu vamwe vanahase kutukanyisa kuhanjika vyawangana waKalunga. Oloze natutwalaho lika kwambulwila vakwetu vyuma vyamwaza vize Yesu mwakalingila vatu.

Omu Yesu apwile hano hamavu, kayapwile shimbu yenyi yakuyula mwamwanganako. Nyi eyi shimbu naikeza lwola muka? Tumbaji twaYesu navasaka vejive. Chikiko chihande chinakavangizaho.

Mateu 21:1-17; Yowano 12:12-16.