TEJ tzmataq kybʼajlen tqʼanen kabʼe moẍ, pon Jesús toj jun tal kojbʼil nqa ttxlaj Jerusalén. Xi tqʼmaʼn kye kabʼe t-xnaqʼtzbʼen kyjalu: ‹Kyxiʼye toj jun tal tnam tokx chixin; atztzun kknetel jun tal bur kyuʼne. Kypujuʼmile ex kyiʼntze tzalu›.

Tejtzun tul kyiʼn t-xnaqʼtzbʼen Jesús tal bur, jax Jesús tibʼaj ex xiʼtzen tuj Jerusalén, aju nqayintaq taʼ. Tej chʼinxteq tpon, i etz txqan xjal kʼamolte. Chʼixme kykyaqil xjal kubʼ kylikʼen kyxbʼalun tuj tbʼe. Atzen junjuntl kubʼ kyqʼoʼn tqʼobʼ tzeʼ toj tbʼe, ex e jaw ẍchʼin kyjalu: ‹¡Kʼiwlaʼnwt aju ajkawil tzul toj tbʼi Jehová!›

Toj ambʼil ojtxi aqeju nchi oktaq te ajkawil toj Israel, nchi okxteq tuj Jerusalén tibʼaj jun bur te jun yekʼbʼil kye tnam xjal. Iktzun bʼantju tuʼn Jesús. Aqetzun xjal lu nkubʼ kyyekʼen qa kyajbʼil tuʼn tok Jesús te ajkawil. Naqtzun tuʼnj nya kykyaqil xjal kyajbʼil tuʼn tok te ajkawil. Nel qnikʼ tiʼj jlu tuʼnju ikʼ tej tpon Jesús toj tja Dios.

E kubʼ tqʼanen Jesús qe moẍ ex qe xjal tzkajtoq taʼ kyximlal atz tuj tja Dios. Tej kylonte kʼwaʼl jlu, e ok ten bʼitzel te nimsabʼil te Jesús. Tej tok kybʼiʼn pal jlu e jaw qʼojle tuʼn ex xi kyqʼamaʼn te Jesús: ‹¿Mape tbʼiya aju in kymaʼn kʼwaʼl?›

‹Ma nbʼiye›, chi Jesús. ‹¿Bʼajxpe jaw kyẍchʼiʼne tuj Tuʼjil jatumel in tqʼamaʼn jlu: Toj kytzi tal kʼwal kʼeletz bʼitz tuʼn Dios?› Tuʼntzunju, kukxtaq in chi nimin qe kʼwal te ajkawil aju otaq tzaj tqʼoʼn Dios.

Ax ikx qe iltiʼj tuʼn qok ik tzaʼn qe tal kʼwaʼl. Atle junjun xjal nya kyajbʼil tuʼn qpakbʼan tiʼj tkawbʼil qMan Dios. Atzen qe kukx qo yolil kyukʼe txqantl xjal tiʼj aju tbʼanelxix kbʼantel tuʼn Jesús kye xjal.

Tej tten Jesús twitz Txʼotxʼ naʼmxteq tpon ambʼil tuʼn tkawen. ¿Jtojteqtzen bʼaʼn tuʼn tkawintz? Kyajteq t-xnaqʼtzbʼen Jesús tuʼn tel kynikʼ tiʼj jlu. Atzuntlju qo xnaqʼtzal tiʼj jaʼle.